ПОЛИЦИЯ ҚЫЗМЕТКЕРЛЕРІ ПРОФИЛАКТИКАЛЫҚ ІС-ШАРА БАРЫСЫНДА 4 658 ЕРЕЖЕ БҰЗҒАН ЖАЯУ ЖҮРГІНШІ АНЫҚТАДЫ

19 сәуірден бастап Алматы облысының аумағында жол қозғалысы қауіпсіздігін қамтамасыз етуге, жол-көлік оқиғаларының алдын алуға және жол қозғалысы ережелерін бұзуды азайту шараларын күшейтуге бағытталған республикалық «Қауіпсіз жол» жедел профилактикалық іс-шарасы өтіп жатыр.

– Іс-шара аясында полиция қызметкерлері рейдтік тексерулер жүргізіп, көлік жүргізушілері мен жаяу жүргіншілердің жол жүру ережелерін сақтауын бақылауда. Сонымен қатар, жол қозғалысына қатысушылар арасында түсіндіру жұмыстары да жүргізілуде – деп мәлімдеді тәртіп сақшылары.

Есептік кезеңде полиция қызметкерлері жол жүру қағидаларын бұзуға қатысты 16 339 әкімшілік құқықбұзушылықты анықтады. Оның ішінде 4 658 жаяу жүргінші тарапынан жасалған заңбұзушылық тіркелген.

– Бұдан бөлек, 430 автокөлік айып тұрағына қойылып, 796 көлік құралының мемлекеттік тіркеу нөмірлік белгілері шешілді, – деп толықтырды облыстық департамент өкілдері.

Алматы облысының полициясы әрбір жол қозғалысына қатысушының жол жүру ережелерін сақтау міндет екенін еске салады. Жолдағы тәртіп барша азаматтың өмірі мен денсаулығының қауіпсіздігінің кепілі.