БАЙҚАДЫҢ БА – ДЕРЕУ ХАБАРЛА: ПОЛИЦИЯ МЕН ЖАСТАР ЕСІРТКІ ҚАУПІНЕ ҚАРСЫ БІРІКТІ

Алматы облысы полиция департаменті есірткі қылмыстарының алдын алу жөніндегі кеңес жастар арасында есірткі қылмысының алдын алуға бағытталған бейнеролик әзірлеу бастамасын көтерді.

Бейнероликтің басты идеясы – бейжай қалмау. Бұл – жасөспірімдер мен жастар арасында жиі кездесетін жағдайлар туралы: шифрланған жазулары бар түрлі-түсті граффити, аулалар мен саябақтардағы күмәнді «есірткі жасырулар», белгісіз адамдардың ғимараттарда таңбалар қалдыруы. Мұның бәрі – есірткі қаупінің белгілері

– Біз әрбір жасөспірімге жеткізгіміз келетіні: сенің дауысың маңызды. Немқұрайлық таныту біреудің өміріне қауіп төндіруі мүмкін, ал белсенділік танытсаң – болашақты сақтап қалуыңа ықтимал. Егер күмәнді заттардың куәгері болсаң – әрекетсіз қалмай, дереу полицияға хабарла. Бұл – нағыз азаматтық ұстаным, – дейді жоба авторлары.

Бейнероликте есірткіге қарсы күрес – тек полицияның ғана емес, бүкіл қоғамның міндеті екеніне ерекше назар аударылған. Әсіресе жастардың рөлі маңызды, себебі олар – есірткі таратушылардың басты нысанасы ғана емес, сонымен бірге оларға қарсы тұра алатын күш.

Бейнеролик әлеуметтік желілерде, мектептерде, колледждер мен жоғары оқу орындарында кеңінен таралуда. Оның мақсаты – үрей тудыру емес, керісінше, сананы оятып, өзіңе және өзгелерге деген жауапкершілік сезімін қалыптастыру.

Алматы облысының полициясы азаматтарды бейжай қалмауға шақырады: егер есірткі-граффити, жасырылған заттар немесе күмәнді тұлғаларды байқасаңыз, дереу полицияға хабарлаңыз. Сіздің ақпаратыңыз біреудің өмірін сақтап қалуы мүмкін.

Елдің болашағы – жастардың қолында. Дұрыс таңдау жаса: үнсіз қалу немесе зұлымды тоқтату.