ҚОНАЕВ ҚАЛАСЫНДА ЕСІРТКІГЕ ҚАРСЫ КҮРЕСТІ КҮШЕЙТУ МӘСЕЛЕЛЕРІ ТАЛҚЫЛАНДЫ

2025 жылғы 15 сәуірде Қонаев қаласында Алматы облысы әкімінің бірінші орынбасары Н.Е. Абдрахимнің төрағалығымен есірткіге және есірткі бизнесіне қарсы іс-қимыл жөніндегі мемлекеттік органдар қызметінің үйлестірілуін қамтамасыз ететін өңірлік Ведомствоаралық штабтың отырысы өтті.

Штаб жұмысына облыстық басқармалар басшылары, аудан және қала әкімдері, сондай-ақ мүдделі мемлекеттік органдардың өкілдері қатысты. Жиын барысында нашақорлықтың алдын алу, есірткі құралдарының заңсыз айналымына қарсы күрес, сондай-ақ үкіметтік емес ұйымдармен және бұқаралық ақпарат құралдарымен өзара іс-қимыл мәселелері қаралды.

– Жиын қорытындысы бойынша жастар арасында алдын алу шараларын жалғастыру, әлеуметтік жарнама және медиа арқылы ақпараттық жұмыстарды күшейту, қоғамдық орындарда бейнероликтер көрсету, сондай-ақ заңсыз контент тарататын интернет-ресурстарды бұғаттау бойынша бірлескен шараларды жандандыру туралы шешім қабылданды, – деп хабарлады полицияда.

Сонымен қатар, нашақорлыққа қарсы күрес күніне арналған іс-шаралар жоспарын әзірлеу және жүзеге асыру тапсырылды. 2023–2025 жылдарға арналған кешенді жоспардың орындалуы бойынша жинақталған ақпарат ұсынылатын болады.