20 НАУРЫЗ - ҰЛТТЫҚ СПОРТ КҮНІ

Наурыз мерекесін тойлау аясында Алматы облысы полиция қызметкерлері арасында ұлттық спорт күніне арналған жарыстар өтті. Бұл турнирге облыстық Полиция департаментінің аппараты мен барлық аудандық және қалалық бөлімшелерінің ең мықты спортшылары жиналды.

Үлкен қызығушылықты «Қазақша күрес» белдесулері тудырды, онда бәсекелестік өте жоғары деңгейде өтті. Полицейлер өздерінің күшін, төзімділігін және жауынгерлік рухын көрсетіп, жеңіске жетуге ұмтылды. Қайсар күрестің нәтижесінде жалпыкомандалық есепте Полиция департаментінің аппараты жеңімпаз атанды. Екінші орынды Еңбекшіқазақ ауданы Полиция басқармасының қызметкерлері иеленсе, үшінші орынды Талғар ауданы Полиция басқармасының командасы жеңіп алды.

«Түйе палуан» атағын айрықша шеберлігі мен мықтылығын көрсеткен Жедел қимылдайтын арнайы жасағының қызметкері Жігер Сәкенұлы жеңіп алды. Күн мен түн теңелу күніне орай ұйымдастырылған спорттық жарыстар полиция қызметкерлерінің командалық рухын нығайтып қана қоймай, ұлттық дәстүрлер мен спорттың маңыздылығын айқындады.