АЛМАТЫ ОБЛЫСЫ ПОЛИЦИЯ ДЕПАРТАМЕНТІНДЕ СОТҚА ДЕЙІНГІ ТЕРГЕП-ТЕКСЕРУ МӘСЕЛЕЛЕРІ ТАЛҚЫЛАНДЫ

2026 жылғы 11 тамызда Алматы облысы Полиция департаменті бастығының орынбасары, полиция полковнигі Рустам Абдрахмановтың төрағалығымен сотқа дейінгі тергеп-тексеруді ұйымдастыру мәселелері бойынша жұмыс кеңесі өтті.

Іс-шараға ҚР Ішкі істер министрлігі Тергеу департаментінің өкілі, басқарма бастығының орынбасары, полиция полковнигі Н.О. Тасмағамбетов, сондай-ақ тергеу бөлімшелерінің, анықтау бөлімдерінің және киберқылмыстарды тергеп-тексеру бөлімшелерінің басшылары қатысты.

Кеңес барысында процестік мерзімдерді сақтау, қылмыстық істерді толық әрі объективті тергеп-тексеру, қабылданатын процестік шешімдердің сапасы, келтірілген залалды өтеу және істер бойынша созбалаңдыққа жол бермеу мәселелері талқыланды.

Ведомстволық бақылауды күшейтуге және тергеу жұмысын ұйымдастырудағы басшылардың жеке жауапкершілігін арттыруға ерекше назар аударылды.

Кеңес қорытындысы бойынша аумақтық бөлімшелердің басшыларына сотқа дейінгі тергеп-тексерудің тиімділігін арттыруға және азаматтардың құқықтары мен заңды мүдделерін қорғауды қамтамасыз етуге бағытталған нақты тапсырмалар берілді.