Алматы облысы ЖҚАЖ қызметкерлері дүниежүзілік донор күні алдында қан тапсырды

Дүниежүзілік донор күні қарсаңында Алматы облысы Полиция департаментінің жедел қимылдайтын арнайы жасақ қызметкерлері қайырымдылық акциясына қатысып, қан тапсыру шарасын өткізді.

Шара аясында шамамен 40-қа жуық ЖҚАЖ қызметкері облыстық қан орталығына барып, медициналық мекемелердегі өмірлік маңызы бар қорды толықтыруға өз үлестерін қосты.

Қатысушылардың айтуынша, донор болу – азаматтық жауапкершіліктің маңызды көрінісі және шұғыл көмекке мұқтаж жандарға нақты қолдау көрсету мүмкіндігі. Арнайы жасақ қызметкерлері адамдарға көмектесу олардың қызметтік міндетімен қатар, күнделікті өмірлік ұстанымдарының да бір бөлігі екенін атап өтті.

Қан орталығының өкілдері полиция қызметкерлеріне белсенді азаматтық ұстанымы үшін алғыс білдіріп, әрбір қан тапсырудың бірнеше адамның өмірін сақтап қалуға мүмкіндік беретінін жеткізді.