Алматы облысында мектеп бітіру кезеңінде қауіпсіздік күшейтілді

Алматы облысы Полиция департаментінің патрульдік полиция батальоны қызметкерлері мектеп бітіру кештері мен соңғы қоңырау іс-шаралары кезінде қоғамдық және жол қауіпсіздігін қамтамасыз етуге бағытталған профилактикалық жұмыстарды күшейтті. Негізгі мақсат – жол қозғалысы ережелерінің бұзылуына жол бермеу, жол-көлік оқиғаларының алдын алу және мерекелік шаралардың қауіпсіз өтуін қамтамасыз ету.

Полиция қызметкерлері түлектер қатысатын автокеруендерге ерекше бақылау орнатып, қауіпті көлік жүргізу, маневр жасау қағидаларын бұзу, жолаушылардың көлік терезелері мен люктерінен шығуы, сондай-ақ кәмелетке толмағандардың көлік басқаруы сияқты құқық бұзушылықтарға баса назар аударуда.

– Патрульдік экипаждар мұндай жағдайлардың алдын алуға және құқық бұзушылықтарды дер кезінде тоқтатуға бағытталған. Сонымен қатар полицейлер түлектермен, жүргізушілермен және ата-аналармен түсіндіру жұмыстарын жүргізіп, жол қозғалысы ережелерін сақтау мен заң талаптарын бұзған жағдайда жауапкершілік туралы ақпарат беруде, – деп хабарлады полиция өкілдері.

Анықталған құқық бұзушылықтар бойынша жүргізушілер заңнамаға сәйкес жауапкершілікке тартылды. Ведомство мұндай алдын алу шаралары қайғылы жағдайлардың алдын алып, азаматтардың қауіпсіздігін қамтамасыз етуге мүмкіндік беретінін атап өтті.

Полиция мектеп бітіру кештері тыныш әрі қауіпсіз өтуі тиіс екенін еске салып, түлектер мен ата-аналарды қоғамдық тәртіпті сақтауға шақырды.