Алматы облысының полицейлері балаларға танымдық экскурсия ұйымдастырды

Полиция қызметкерлері Қонаев қаласындағы арнаулы әлеуметтік қызметтерді қажет ететін балаларды қолдау облыстық орталығының тәрбиеленушілерімен бірге Алматы облысы Полиция департаментінің кинологиялық орталығына барды.

– Экскурсия барысында кинологиялық қызметтің мамандары қызметтік-іздестіру иттерімен бірге есірткі және жарылғыш заттарды іздеу, сондай-ақ шартты қылмыскерді ұстау тәсілдерін көрсетті. Балалар полицияның төрт аяқты көмекшілерінің жұмысын қызығушылықпен бақылап, кинолог мамандығы мен иттерді даярлау ерекшеліктері туралы сұрақтар қойды, – деп хабарлады Алматы облысы ПД бастығы Мейрам Әбікеев.

Тәрбиеленушілер үшін өздерін нағыз кинолог ретінде сезіну ерекше әсер қалдырды. Балалар иттермен жақын танысып, оларды сипап, естелік суретке түсті.

– Іс-шара жылы әрі достық атмосферада өтіп, Алматы облысы бойынша нашақорлық құқық бұзушылықтарының алдын алу жөніндегі кеңестің қолдауымен ұйымдастырылды. Кездесудің басты мақсаты – жас ұрпақтың полицияға деген сенімін қалыптастыру, есірткі қылмыстарының алдын алу, сондай-ақ балалардың бойында жауапкершілік пен құқық қорғау қызметіне құрмет сезімін дамыту, – деп қосты полковник Әбікеев.

Алматы облысы Полиция департаментінде мұндай іс-шаралар полиция мен қоғам арасындағы өзара байланысты нығайтып, балаларға жаңа білім мен жарқын жағымды эмоциялар сыйлайтынын атап өтті.