ТҮНГІ ЖОЛ ҚАУІПСІЗДІГІ – ПОЛИЦЕЙЛЕР БАҚЫЛАУЫНДА: АЛМАТЫ ОБЛЫСЫНДА ЖКО-НЫҢ АЛДЫН АЛУ ШАРАЛАРЫ ЖҮРГІЗІЛУДЕ

Түнгі уақытта, көпшілік тұрғын демалыста болған сәтте, Алматы облысының патрульдік полиция қызметкерлері жол-көлік оқиғалары жиі тіркелетін аумақтарда тәуліктің қараңғы мезгілінде де өз қызметін жалғастыруда. Әсіресе рульде отырған жүргізушілердің ұйқылы күйге түсуінен болатын апаттардың алдын алуға ерекше назар аударылып отыр.

Алматы облысы полиция департаментінің басшылығы да түнгі рейдтерге тікелей қатысып, жолда жүрген полиция қызметкерлеріне қолдау көрсетіп, жүргізіліп жатқан шаралардың орындалуын бақылауда.

– Біздің басты мақсатымыз – қайғылы жағдайлардың алдын алу. Түнгі мезгілде, әсіресе таңға жуық уақыттарда жүргізуші шаршап, бірнеше секундқа ғана болса да көлікті басқару қабілетінен айырылуы мүмкін. Мұндай сәттердің соңы өте ауыр салдарға әкеліп соғуы ықтимал. Сондықтан біз жай ғана патруль жүргізіп қоймаймыз – жүргізушілермен сөйлесіп, түсіндіру жұмыстарын жүргіземіз, көліктерді тоқтатып, оларға үзіліс жасауға, ыстық шай не кофе ішуге кеңес береміз, – дейді тәртіп сақшылары.

Мұндай іс-шаралар – жай ғана формалдылық емес, бұл – жол қозғалысына қатысушылардың өмірі мен денсаулығын сақтау бағытындағы маңызды алдын алу шарасы. Полиция азаматтарға шын мәнінде көмек қажет сәтте олардың жанынан табылуға тырысады.

Аталған профилактикалық жұмыс алдағы уақытта да жалғасып, өңірдегі ең қауіпті және жүктемесі жоғары жолдарды қамтитын болады. Жол қауіпсіздігі – Алматы облысы полициясының басты басымдығы болып қала береді.