ҰЙҒЫР АУДАНЫНДА ЖОЛ ЖАҒДАЙЫН БАҚЫЛАУ ҮШІН ДРОНДАР ҚОЛДАНЫЛУДА

Ұйғыр ауданында полицейлер автожолдарды патрульдеу үшін дрон аппараттарын қолдануда. Аталған шара 9–18 шілде аралығында Алматы облысы аумағында өтіп жатқан «Қауіпсіз жол» жедел алдын алу іс-шарасы аясында жүзеге асырылуда.

Дрондардың көмегімен жол қозғалысы ережелерінің бұзылуы, әсіресе көрінуі шектеулі немесе көлік жүктемесі жоғары учаскелерде жедел түрде анықталып отыр.

– Әуеден патрульдеу жолдардың үлкен бөлігін қысқа мерзімде қамтуға мүмкіндік береді. Бұл қауіпті маневрлерді, қарсы бағытқа шығу және өзге де өрескел заңбұзушылықтарды дер кезінде анықтауға сеп болады, – дейді полиция қызметкерлері.

Мұндай тәжірибе өз тиімділігін көрсетіп үлгерді. Әуеден бақылау барысында жол ережесін бұзған көлік жүргізушілері нақты уақыт режимінде тіркеліп, ақпарат патрульдік жасақтарға жедел жолданады.

«Қауіпсіз жол» іс-шарасы жол-көлік оқиғаларының алдын алуға және жүргізушілер арасындағы тәртіпті арттыруға бағытталған. Полиция қызметкерлері барлық жол қозғалысына қатысушыларды ережені сақтауға шақырып, қауіпсіздік әр адамның жеке жауапкершілігінен басталатынын ескертеді.