Алматы облысы полиция қызметкерлерінің балаларына арналған үлкен мереке

Халықаралық балаларды қорғау күніне орай облыс орталығында ішкі істер органдары қызметкерлерінің балаларына арналған мереке ұйымдастырылды.

Іс-шара полиция қызметкерлерінің отбасыларына алғыс білдіру мақсатында ұйымдастырылды. Өйткені дәл осы жақындары – отбасы мүшелері – полиция қызметінің барлық ауыртпалығын бірге көтеріп, кез келген сәтте сенімді тірек бола біледі. Балалар үшін түрлі ойын-сауық бағдарламасы, көңілді сайыстар, дәмді тәттілер мен сыйлықтар дайындалды. Аниматорлар көтеріңкі көңіл күй сыйлап, мерекенің әр сәті қуаныш пен шаттыққа толы болды.

– Отбасы – әрбір қызметкер үшін мызғымас тірек. Бүгін біз балаларымызға шыдамдылықтары мен түсініктері үшін алғыс айтқымыз келеді. Олар бізді күтіп, сеніп, мақтан тұтады, – деп атап өтті ұйымдастырушылар.

Бұл мереке тағы бір маңызды жайтты көрсетті: полицейлердің балалары адалдыққа, тәртіпке және елге қызмет етуге құрметпен қарайтын ортада өсіп келеді. Бұл қасиеттер олардың өмірлік ұстанымына айналып, болашақта да дұрыс жолмен жүруге негіз болады.