Мектептердегі қауіпсіздік: Ақтөбеде күзет ұйымдарының басшыларымен кездесу өтті

Ақтөбе қаласында өңірдегі мектептер мен балабақшалардың қауіпсіздігін қамтамасыз ету мәселелеріне арналған кеңейтілген кеңес өтті. Жиынға облыстағы жекеменшік күзет ұйымдарының басшылары мен өкілдері шақырылды.
Жұмыс кеңесі Ақтөбе облысы әкімінің орынбасары Батырхан Жолдастың төрағалығымен өтіп, облыстық Ақтөбе облысының Полиция департаменті бастығының орынбасары Ардана Саймаганбетовтың, сондай-ақ тиісті мемлекеттік органдар өкілдерінің қатысуымен ұйымдастырылды.
Кездесу барысында білім беру мекемелеріндегі қолданыстағы қауіпсіздік шараларының тиімділігі талқыланды. Қатысушылар бейнебақылау жүйелерінің және дабыл түймелерінің жұмысы, жедел шақыру батырмаларының болуы, өткізу режимінің сапасы, күзет қызметкерлерінің кәсіби даярлығы мәселелерін қарастырды. Сондай-ақ төтенше жағдайлар туындаған жағдайда — рұқсатсыз кіруден бастап террористік қауіп-қатерлерге дейін — нақты іс-қимыл алгоритмдерінің болуы мен орындалуына ерекше назар аударылды.
Күзет қызметкерлерін тұрақты түрде оқыту және нұсқама жүргізу, мектеп әкімшілігі, құқық қорғау органдары мен жедел қызметтердің қатысуымен бірлескен оқу-жаттығулар өткізу қажеттігі атап өтілді. Бұдан бөлек, нысандардың техникалық жарақтандырылуына қойылатын талаптар, лицензиялық нормаларды сақтау және міндеттерді тиісінше орындамағаны үшін күзет ұйымдарының жауапкершілігі мәселелері талқыланды.
Кеңес қорытындысы бойынша полиция, жергілікті атқарушы органдар және жекеменшік күзет компаниялары арасындағы өзара іс-қимылды күшейтуге бағытталған нақты ұсыныстар әзірленді. Балалардың қауіпсіздігі әрдайым басым бағыт болып қала беретіні және білім беру ұйымдарының күзет жағдайына бақылау тұрақты негізде жалғасатыны атап өтілді.