Ақмола облысында аса ірі көлемде балықты құжатсыз тасымалдаған жүргізуші ұсталды

Ағымдағы жылдың 6 ақпанында сағат 03:10 – да «Астана-Петропавловск» автожолының 285 шақырымында Ақмола облысы ПД патрульдік полиция батальонының қызметкерлері «Газель» маркалы автокөлікті басқарған 27 жастағы ер адамды тоқтатты.
Жүк салғышты тексерген кезде полицейлер жалпы салмағы шамамен 2 тонна болатын мөңке балықтарымен қаптарды тапты. Жүргізуші балықты сату үшін Солтүстік Қазақстан облысынан Астанаға тасымалдағанын, алайда өзімен бірге тиісті құжаттары болмағанын түсіндірді.
Осы факт бойынша тексеру жүргізілуде, оның нәтижелері бойынша процестік шешім қабылданатын болады.
Сонымен қатар, көлік құралын тексеру кезінде Газельде тиісті құжаттар мен рұқсаттарсыз автоматты беріліс қорабы орнатылғаны анықталды. Осыған байланысты жүргізушіге қатысты ҚР ӘҚБтК 590-бабының 7-бөлігі бойынша әкімшілік хаттама жасалды.
Полицейлер табиғи ресурстарды қорғауды реттейтін заңдарды сақтау қажеттілігін еске салады және азаматтарды браконьерлік фактілері туралы хабарлауға шақырады.