Бұланды ауданында 500-ден астам ағаш заңсыз кесілді: полиция қылмыстық іс қозғады

Бұланды ауданында полицейлер заңсыз ағаш кесу фактісін тергеп жатыр. Табиғатты қорғау полициясының мәліметінше, Отрадный орман шаруашылығы аумағында 581 қарағай мен аққайың кесіліп, мемлекетке келтірілген залал 980 мың теңгеден асты.
Полицияға ағаштардың заңсыз кесілген фактісі туралы орман шаруашылығы қызметкерлері хабарлады. Оқиға орнына келген полиция қызметкерлері Бұланды ауданының Алтынды ауылының тұрғынын анықтады, оның қатысы тексеріліп жатыр.
Осы факті бойынша қылмыстық іс қозғалды. Қазіргі уақытта заңсыз әрекеттің себептері мен мақсаттары белгіленуде. Алдын ала мәліметтер бойынша, кесілген ағаш одан әрі сатуға арналған болуы мүмкін.
Сотқа дейінгі тергеп-тексеру шеңберінде болған оқиғаның барлық мән-жайлары, сондай-ақ заңсыз кесуге қатысы бар ықтимал адамдар белгіленуде.
Полиция ағаштарды заңсыз кесу қоршаған ортаға айтарлықтай зиян келтіретінін және заңмен белгіленген жауапкершілікке тартылатынын еске салады.
Құқық қорғау органдары азаматтарды мұндай бұзушылықтарға жол бермеуге және орманды заңсыз кесу фактілері және табиғи ресурстарды қорғау саласындағы басқа да құқық бұзушылықтар туралы Ішкі істер органдарына хабарлауға шақырады.