Аршалы ауданында қолдан жасалған фитолабораторияның көзі жойылды

Аршалы ауданында полицейлер Ақмола облысы прокуратурасының үйлестіруімен жергілікті тұрғын өз үйінің шкафында жабдықталған қолдан жасаған фитолабораторияны жойды.
Құқық қорғау органдарының хабарлауынша, жедел-іздестіру іс-шаралары барысында ұйымдасқан қылмысқа қарсы күрес басқармасының қызметкерлері есірткімен заңсыз жұмыс жасау фактісін анықтаған.
Ақбұлақ ауылының тұрғынының үйіне жүргізілген тінту аясында жедел уәкілдер құрамында есірткі бар өсімдіктерді өсіру бойынша шағын зертхана тапты. Өсіру орыны кәдімгі шкафқа жасырылған және қолдан жасалған құралдармен жабдықталған. Алдын ала мәліметтер бойынша, ер адам қолда бар материалдарды пайдаланып, жарықтандыру, желдету және микроклиматты сақтау жүйесін өзі жасаған.
Анықталған жерден полицейлер қарасора тұқымын, өсімдіктер отырғызылған ыдыстарды, сондай-ақ дайын өнімді тәркіледі. Алынған заттардың көлемі және олардың нақты құрамы сараптама барысында белгіленетін болады.
Сонымен қатар, күдіктінің үйінен пневматикалық мылтық пен оның оқ-дәрілері табылды. Иесінің айтуынша, қару оған туысынан қалған.
Ер адам есірткіні тек жеке пайдалану үшін өсіргенін және таратумен айналыспағанын айтып мәлімдеді. Алайда оның барлық айғақтары қазір мұқият тексерілуде.
Осы факті бойынша сотқа дейінгі тергеу басталды. Құқық қорғау органдары болған оқиғаның барлық мән-жайларын, сондай-ақ ер адамның басқа құқық бұзушылықтарға қатысын анықтауда.