Жеңіл табыс қылмыстық жауапкершілікке әкеп соқты: Көкшетау тұрғыны дропперлік іс бойынша күдікті болып шықты

Ақмола облысында алаяқтық әрекеттер жасау үшін банктік шотқа заңсыз қол жеткізу фактісі бойынша қылмыстық іс тергелуде. Көкшетау қаласының 25 жастағы тұрғыны істің күдіктісі болып шықты.
Полицияның хабарлауынша, қыз Telegram мессенджері арқылы "қосымша жұмыс" туралы ұсыныс алған. Белгісіз пайдаланушы қарапайым табыс схемасын айтып берген: яғни, оның банктік картасына ақша түседі, оны тез арада басқа шоттарға аудару керек. Әрбір транзакция үшін қызға белгілі бір пайыз уәде етілген.
Күдікті мұндай іс-әрекеттің алаяқтықпен байланысты болуы мүмкін екенін түсінгенімен тез табысқа қызығып, жаңа жұмыс берушінің шарттарына келіскен. Шоттар мен оның иесі дереу құқық қорғау органдарының назарына ілікті, ал бұл факт бойынша қылмыстық іс қозғалды.
Полицейлер банк деректемелерін үшінші тұлғаларға беру, сондай-ақ бейтаныс адамдардың өтініші бойынша қаражат аударымдарына қатысу қылмыстық жауаптылыққа әкеп соғуы мүмкін екенін еске салады. Көбінесе адамдар мұндай ұсыныстардың салдарын ойламай келіседі, бірақ осылайша олар алаяқтық схемаларға қатысатындығын есте ұстаған жөн.
Құқық қорғау органдары аймақ тұрғындарын қырағы болуға және интернетте "оңай ақша табу" туралы күмәнді ұсыныстарға келіспеуге шақырады. Қолма-қол ақшаны қабылдау және аудару үшін өзіңіздің банктік карталарыңызды пайдалану қажет болатын жұмыс орындарына әсіресе қырағы болу керек.