Қоқыс тастады — камераға түсіп қалды: Абай облысында 10 мыңнан астам заңбұзушылық анықталды

Бейнебақылау камералары Абай облысының полицейлеріне аулаларды, көшелерді және басқа да қоғамдық орындарды ластайтын азаматтарды анықтауға мүмкіндік береді.

Қалалар мен елді мекендерді абаттандыру ережелерін бұзудың 9 916 фактісі тіркелді. Сонымен қатар 851 факт қоғамдық орындарды ластауға қатысты.

Қоғамдық тәртіпті сақтау мақсатында 1 931 бейнебақылау камерасы жұмыс істейді. Оның 1 013-і тұрғын үйлердің аулаларына орнатылған. Камера жазбалары құқық бұзушыларды анықтап, оларды жауапкершілікке тартуға мүмкіндік береді.

Жергілікті атқарушы органдармен бірлесіп 73 рұқсат етілмеген қоқыс орны жойылды.

Абай облысының полиция департаменті ескертеді: көше, аула немесе қоқыс контейнерлері орналасқан алаң — қалдықтарды бейберекет тастайтын орын емес.

Қоқысты белгіленбеген жерлерге тастамаңыз және құқық бұзушылықтарға бейжай қарамаңыз. Қаланың тазалығы әр адамның жауапкершілігінен басталады.