Білгенің абзал: Мопед тізгіндегенде нені білу қажет.

Абай облысы Полиция департаменті мопед жүргізушілері білуі тиіс маңызды ескерту жасайды.
Қала көшелерінде зулап жүрген мопедтер  – жай ғана ыңғайлы көлік емес, олар толыққанды жауапкершілікті талап ететін қозғалыс құралы. Әрбір рөлге отырған сәт – сіздің ғана емес, айналаңыздағы адамдардың өмірі мен қауіпсіздігіне әсер ететін маңызды шешім екенін ұмытпаңыз

Мопед тізгіндеу еркіндік сыйлағанымен, ол еркіндік тәртіппен ұштасқанда ғана қауіпсіз болады. Сондықтан мопед жүргізушісі міндетті түрде тиісті санаттағы жүргізуші куәлігіне (A1, A немесе B) ие болуы тиіс  Бұл – жай формальдылық емес, сіздің жолдағы біліміңіз бен дайындық деңгейіңіздің дәлелі

Сонымен қатар, мопед – тіркелуі тиіс көлік. Мемлекеттік тіркеу нөмірі мен техникалық паспортының болуы – заң талаптарын орындау ғана емес, кез келген жағдай кезінде сіздің құқықтарыңызды қорғаудың кепілі

Қауіпсіздік – сән емес, қажеттілік  Желмен жарыса жүйткігенде, бір ғана қорғаныс құралы – мотошлем  сіздің өміріңізді сақтап қалуы мүмкін. Жүргізуші де, жолаушы да мотошлем киюі міндетті  Бұл талапты елемеу – өз өміріңізді қауіпке тігу деген сөз.

Қала ішінде қозғалу мәдениетін де ұмытпайық  Мопедпен жүру жолдың оң жақ жиегімен немесе арнайы велосипед жолдарымен  жүзеге асырылуы тиіс. Ал тротуар – жаяу жүргіншілерге арналған қауіпсіз аймақ  Олардың кеңістігін құрметтеу – өркениетті қоғамның белгісі.

Ең бастысы – рөлге мас күйде отыруға болмайды  Алкоголь немесе өзге де масаң күй сіздің реакцияңызды төмендетіп, қайғылы жағдайларға әкелуі мүмкін. Бұл тек заң бұзушылық емес, адам өміріне төнген нақты қауіп

Жол – барлығымызға ортақ кеңістік  Онда әрқайсымыздың жауапкершілігіміз бар. Ережені сақтау – айыппұлдан қашу емес, өмірді қорғау. Әр сапарыңызды қауіпсіз әрі саналы түрде жоспарлаңыз.

Өзіңізді және жақындарыңызды қорғаңыз  Жол қозғалысы ережелерін сақтаңыз – бұл сіздің ең дұрыс таңдауыңыз!