Жастарды қорғау жолындағы маңызды қадам – вейптерге тыйым

Абай облысы ПД Қоғамдық қауіпсіздік басқармасы бастығының орынбасары полиция подполковнигі Нурекенов Мейірбек Абай облысы Өңірлік коммуникациялар қызметімен өткен подкастта вейптердің зияны мен заң тұрғысынан жауапкершілікке кеңінен тоқталды.

Қазақстан Республикасында қоғамдық денсаулықты қорғау және жас ұрпақты зиянды әдеттердің ықпалынан сақтау – мемлекеттік саясаттың маңызды басымдықтарының бірі. Осы бағыттағы жүйелі шаралардың бірі ретінде 2024 жылғы 20 маусымнан бастап елімізде электрондық тұтыну жүйелерінің (вейптердің) айналымына толық заңнамалық тыйым енгізілді.

Бұл шешім халықтың, әсіресе жастардың денсаулығын сақтау, никотин өнімдерінің таралуын шектеу және зиянды тәуелділіктің алдын алу мақсатында қабылданды.

Вейп – құрамында никотині бар немесе никотинсіз сұйықтықты қыздыру арқылы аэрозоль (бу) түзетін және оны пайдаланушы тыныс алу арқылы қабылдайтын электрондық құрылғы. Мұндай құрылғылар электрондық темекі түріне жатады және бу арқылы никотинді немесе өзге де химиялық заттарды адам ағзасына жеткізеді.

Қазақстан Республикасының Қылмыстық кодексінің 301-1-бабына сәйкес шегілмейтін темекі бұйымдарының, электрондық тұтыну жүйелерінің (вейптердің), сондай-ақ оларға арналған хош иістендіргіштер мен сұйықтықтардың айналымына қатысты жауапкершілік белгіленген.

Аталған бапқа сәйкес:

1-бөлігі (сату және тарату):

200 АЕК-ке дейін (865 000 теңгеге дейін) айыппұл;
түзеу жұмыстары;
қоғамдық жұмыстар;
не 50 тәулікке дейін қамауға алу.

2-бөлігі (әкелу және өндіру):

2000 АЕК-ке дейін (8 650 000 теңгеге дейін) айыппұл;
2 жылға дейін бас бостандығын шектеу;
не бас бостандығынан айыру;
мүлікті тәркілеу мүмкін.

3-бөлігі (ауырлататын жағдайлар):
Егер құқық бұзушылық:

қылмыстық топпен жасалса;
аса ірі мөлшерде кіріс алумен ұштасса;
бірнеше рет қайталанса,

онда келесі санкциялар қолданылады:

5000 АЕК-ке дейін айыппұл;
5 жылға дейін бас бостандығынан айыру.

Қазақстан Республикасы аумағында төмендегі әрекеттерге толық тыйым салынған:
 вейптерді өндіруге;
 оларды импорттауға (жеке пайдалану үшін де);
 көтерме және бөлшек саудаға;
 таратуға;
 жарнамалауға;
 коммерциялық айналымға.

2026 жылғы деректерге сәйкес, Абай облысы бойынша Қазақстан Республикасы Қылмыстық кодексінің 301-1-бабы бойынша бірде-бір қылмыс тіркелмеген. Бұл өңір тұрғындарының заң талаптарын сақтауға деген жауапкершілігін және профилактикалық жұмыстардың тиімді жүргізіліп жатқанын көрсетеді.

Қоғамдық денсаулық – ұлттың болашағы. Сондықтан әрбір азамат заң талаптарын сақтап, зиянды әдеттердің алдын алуға бағытталған мемлекеттік бастамаларды қолдауы маңызды. Тек бірлескен жауапкершілік арқылы біз дені сау, қауіпсіз және жарқын болашақты қалыптастыра аламыз.