"Тасымалдаушы" ЖПІШ: Абай облысында 533 құқық бұзушылықтың жолы кесілді.

Абай облысы аумағында Республикалық «Тасымалдаушы» жедел-профилактикалық іс-шарасы аясында жол қауіпсіздігін қамтамасыз ету және жолаушылар мен жүк тасымалы саласындағы құқық бұзушылықтардың алдын алу бағытында ауқымды жұмыстар атқарылды.

Іс-шараның негізгі мақсаты – жол-көлік оқиғаларының алдын алу, заңсыз тасымалдау фактілерін анықтау, сондай-ақ жол қозғалысы қағидаларын өрескел бұзудың жолын кесу арқылы азаматтардың өмірі мен денсаулығын қорғау. Осы бағытта полиция қызметкерлері қоғамдық көліктерді, такси қызметін, қалааралық және халықаралық бағыттағы автобустарды, сондай-ақ жүк автокөліктерін кешенді түрде тексеруде.

Тексеру барысында көлік құралдарының техникалық жай-күйіне, жүргізушілердің еңбек және демалыс режимін сақтауына, міндетті рұқсат құжаттарының болуына, сақтандыру талаптарының орындалуына және жолаушылардың қауіпсіздігін қамтамасыз ету шараларына ерекше назар аударылды.

Жүргізілген іс-шара нәтижесінде облыс аумағында барлығы 533 құқық бұзушылықтың жолы кесілді. Атап айтқанда:

Жолаушыларды, багажды және жүктерді тасымалдау қағидаларын бұзу – 45 дерек;
Техникалық регламент талаптарына сәйкес келмейтін көлік құралдарын басқару – 93 дерек;
Мемлекеттік немесе міндетті техникалық байқаудан өтпеген көлік құралдарын пайдалану – 52 дерек;
Көлік құралын басқару кезінде ұялы телефонды немесе радиостанцияны пайдалану – 103 дерек;
Жолаушылар мен жүктерді тасымалдау талаптарын, қауіпсіздік белдіктерін немесе мотошлемдерді пайдалану қағидаларын сақтамау – 174 дерек.

 Заңсыз жолаушылар тасымалымен айналысатын тұлғаларды анықтау және оларды заңнамаға сәйкес жауапкершілікке тарту бойынша да нақты жұмыстар жүргізілуде.

Полиция департаменті жол қозғалысына қатысушыларды қолданыстағы заңнама талаптарын қатаң сақтауға, көлік құралдарының техникалық жағдайын уақтылы бақылап отыруға және жол мәдениетін арттыруға шақырады.

Жолдағы тәртіп пен қауіпсіздік – әрбір жүргізуші мен жолаушының жауапкершілігі. Қауіпсіздік қағидаларын сақтау – адам өмірін сақтаудың басты кепілі.