Абай облысының полицейі ірі киберқылмыстарды ашқаны үшін мемлекеттік медальмен марапатталды

Қызметтік борышын үлгілі атқарып, киберқылмыстарды әшкерелеуге қосқан зор үлесі үшін Абай облысы Полиция департаментінің Киберқылмысқа қарсы іс-қимыл басқармасының жедел уәкілі полиция капитаны Медғат Талағатұлы Жүнісов «Жауынгерлік ерлігі үшін» медалімен марапатталды.
Марапат Қазақстан Республикасының Президенті Жарлығының негізінде Ішкі істер министрі полиция генерал-лейтенанты Ержан Сапарбекұлы Сәденовтің қолынан табыс етілді.

Қызмет барысында полиция капитаны Медғат Жүнісов кибералаяқтық саласындағы үш ауқымды қылмыстық істі тергеу кезінде жоғары кәсіби шеберлік пен табандылық танытты.

Бірінші қылмыстық іс интернет-платформалар мен жалған аккаунттарды пайдалану арқылы жасалған 55 эпизодтан тұрды. Келтірілген жалпы залал көлемі 8 миллион теңгеден асты.

Екінші іс онлайн-сауда алаңдарының пайдаланушыларының ақшалай қаражатын заңсыз иемденумен байланысты 40 эпизодты қамтыды. Залал сомасы 10 миллион теңгеден жоғары болды.

Үшінші қылмыстық іс ерекше күрделілігімен ерекшеленді: онда шамамен 55 миллион теңге мөлшерінде залал келтірілген ірі көлемдегі 3 эпизод бойынша тергеу жүргізілді.

Полиция капитаны Медғат Жүнісовтің табандылығы, аналитикалық ойлауы және кәсіби дайындығының арқасында барлық қылмыстар ашылып, күдіктілер анықталды, жиналған дәлелдер сотта айыптау үкімдерінің негізіне алынды.

Абай облысы Полиция департаментінің басшылығы полиция капитаны Медғат Жүнісовтің марапатталуы азаматтарды интернет-алаяқтықтан қорғау, киберқауіпсіздікті қамтамасыз ету және ішкі істер органдарына деген сенімді арттыру ісіндегі еңбегінің лайықты мойындалуы екенін атап өтті.