Мемлекеттік органдар Астанадағы Шарын базарының кәсіпкерлерімен кездесті

Сауда Комитетінің төрағасы Айдар Әбілдабеков, Мемлекеттік кірістер комитеті төрағасының орынбасары Әнуар Сүлейменов, Астана қалалық инвестиция және кәсіпкерлік басқармасы басшысының орынбасары Мақсат Жаңабаев және басқа да мемлекеттік органдардың өкілдері Шарын базарының саудагерлерімен кездесті.

Саудагерлерге жаңа салық кодексінің нормалары туралы ақпарат беріліп, мобильді аударымдар, тауарларды шекара арқылы тасымалдау, карантиндік және фитосанитариялық сертификаттар беру бойынша проблемалық мәселелер талқыланды. Сонымен қатар, саудагерлер сату сомасының 0,95% - QR арқылы төлеген кезде бөлшек салық мөлшерлемесін, сондай-ақ банк комиссиясын қайта қарау бойынша ұсыныстар енгізді, бұл олардың пікірінше, азық-түлік бағасын, оның ішінде ӘМАТ-ты төмендетуге мүмкіндік береді. Айта кетейік, базар саудагерлерімен осындай кездесулер үнемі өткізіліп тұрады. 

Шарын көтерме базары "солтүстік" көкөніс хабы. Осы жерден жемістер мен көкөністер елорданың ірі сауда желілеріне ғана емес, Ақмола және Қарағанды облыстарының жақын маңдағы аудандарына да жеткізіледі. Осыған байланысты саудагерлерге әлеуметтік маңызы бар азық-түлік тауарлары бағасын реттеу үшін 15% сауда үстемесін сақтаудың маңыздылығы тағы да еске салынды.