Иран Қазақстандағы қайта өңдеу жобаларына инвестиция салуға дайын

Бұл ұсынысты Иранның Ауыл шаруашылығы министрінің сауда және нарықты реттеу жөніндегі орынбасары Алиреза Пейманпак ҚР Премьер-Министрдің орынбасары –  Сауда және интеграция министрі Серік Жұманғаринмен кездесуде айтты.

Оның айтуынша, ирандық инвесторлар мен өндірушілер дәрі-дәрмек өндірісіне, сүт өнімдерін өндіретін зауыт салуға, ауыл шаруашылығы өнімдерін қайта өңдеуге және т.б. инвестиция салуға дайын. Серік Жұманғарин ирандық әріптестерінің шешімін құптап, барлық ұсыныстарды қазақстандық бизнеске қарауға жіберетінін айтты.

Тараптар сондай-ақ өзара тауар айналымын 3 млрд долларға дейін арттыруға бағытталған жобалардың бірлескен жол картасы жобасын талқылады. Бұл жобалар іс жүзінде барлық салаларды қамтиды, бірақ негізгі пул, шамамен 1 миллиард АҚШ доллары, ауыл шаруашылығы саласындағы жобаларды құрайды. Қазақстандық АӨК өнімдері ирандық тұтынушы арасында өте танымал. Бүгінде қазақстандық кәсіпорындар отандық өнімді Иран нарығына тұрақты түрде жеткізуде. Иранға экспорттың негізгі тауарлары дәстүрлі түрде бидай, арпа, күнбағыс майы, зығыр тұқымы, алюминий және қара металдар болып табылады. Импорттық жеткізілімдер арасында мұнай өнімдері, жаңа піскен көкөністер мен жемістер, құрылыс материалдары басым. Қазақстан мен Иран арасындағы тауар айналымы 2022 жылы өткен жылмен салыстырғанда 19,8%-ға ұлғайып, 528 млн долларды құрады.

Серік Жұманғарин мен Алиреза Пейманпактың кездесуі 2023 жылғы 27 маусымда Астанада өткен Қазақстан-Иран бизнес-форумының қорытындысы бойынша өтті. Іскерлік алаң Қазақстан мен Иранның ірі және орта компанияларының 100-ден астам өкілдерін біріктірді. Ауылшаруашылық тауарларын, тамақ өнімдерін, туристік қызметтерді және инвестицияларды жеткізуге маманданған кәсіпкерлер B2B форматында екіжақты келіссөздер жүргізді.