ЭЫДҰ сарапшылары Қазақстан мен Орталық Азиядағы сауда рәсімдерін оңайлатуды талқылады
ҚР Сауда және интеграция министрлігінің ЭЫДҰ-мен ынтымақтастығы шеңберінде 2022 жылғы мамырда Қазақстан мен Орталық Азияның сауда байланыстарын дамыту жөніндегі жаңа жоба іске қосылды.
2023 жылғы 15 ақпанда Елдік жұмыс тобының екінші кездесуі өтті, онда ЭЫДҰ-ның экспортты ілгерілетудің институционалдық құрылымы бойынша ұсынымдары және экспорттаушы шағын және орта кәсіпорындар үшін «бірыңғай терезе» қызметін құру талқыланды.
Жұмыс тобының отырысына мемлекеттік органдардың өкілдері, ЭЫДҰ-на мүше елдердің елшілері, халықаралық ұйымдар мен экспортты қолдау институттары қатысты.
Екінші жұмыс тобының қатысушыларына ҚР Сауда және интеграция вице-министрі Қайрат Балықбаев бірінші болып сөз сөйледі.
«ОА-ның барлық елдері сауда рәсімдерін оңайлату бойынша ЭЫДҰ индексіндегі өз позицияларын жоспарлы түрде жақсартады. Шолуды дайындау бойынша жұмыстар уақытылы. Біздің еліміз үшін ЭЫДҰ-ның ұсынымдары біздің елімізге ғана емес, бүкіл Орталық Азия өңірінде саудаға оң әсер ететіні сөзсіз», - деп атап өтті вице-министр.
Өз кезегінде «QazTrade» АҚ Бас директорының орынбасары Нұрлан Құлбатыров өңірдегі сыртқы сауданы дамытудың соңғы трендтерімен бөлісті, сондай-ақ трансшекаралық сауда үрдістері туралы айтты.
ЭЫДҰ Еуразия бөлімінің Экономикалық саясат мәселелері жөніндегі талдаушылары Люк Макл мен Дилан ван де Вен экспортты ілгерілету үшін институционалдық негізді нығайту бойынша ЭЫДҰ-на қатысушы елдердің үздік тәжірибелерінің мысалдарын ұсынды.
Сондай-ақ, ЭЫДҰ Сауда саясаты мәселелері жөніндегі талдаушы Сильвия Сореску ОА-да сауда рәсімдерін оңайлату саласындағы жаңартылған индикаторларды ұсынды.
***
ОА елдеріндегі сауда саясаты мәселелері бойынша бірқатар екіжақты кездесулер өткізілді.
ЭЫДҰ сарапшыларымен кездесуде вице-министр Қайрат Төребаев атап өткендей, бүгінгі таңда сауда интеграциясының назары өңірлік деңгейге ауысты.
«Өндірістік кооперацияны тереңдету және тауар ағындарының құрылымын әртараптандыру, біздің ойымызша, Орталық Азия өңіріндегі ынтымақтастық үшін басым бағыттар болып табылады», - деді ол.
Кейін Сыртқы сауда қызметі департаменті директорының орынбасары Дархан Бейсенбаймен сараптамалық кездесу өтті, онда ҚР-дағы сауда рәсімдерін оңайлатудың негізгі бағыттары талқыланды.
Анықтама:
Жобаның II-кезеңі Орталық Азия елдері арасындағы сауда байланысын нығайтуға бағытталған. Жобаның мақсаты - Орталық Азияның алты еліне - Қазақстан, Қырғызстан, Тәжікстан, Түрікменстан, Өзбекстан, Ауғанстанға - сауда байланыстары мен халықаралық интеграцияны кеңейту үшін мүмкіндіктерді барынша пайдалануға мүмкіндік беретін саясат пен құралдар бойынша талдамалық және тәжірибелік басшылық беру. Жобаның ұзақтығы - 2 жыл.