Экспортқа бағдарлану - инвестициялық жобаларды келісу үшін негіз

14 қыркүйекте ҚР Үкіметі отырысында Сауда және интеграция министрі Бақыт Сұлтанов экспорт мәселелері қалай ілгерілеп жатқанын айтты.

Осылайша, ол шикізаттық емес тауарлар экспорты көлемінің қорытындысы бойынша ағымдағы жылы 7 айда 23,4% - ға өсіп, $10,4 млрд құрғанын хабарлады.

"Мыс пен катодтар өсу драйверлеріне айналды, олардың экспорты 40% – ға өсті, ферроқорытпаларды жеткізу 26,7% - ға, болат илегін жеткізу 95,4% - ға ұлғайды", - деп атап өтті Бақыт Сұлтанов.

Министрдің айтуынша, COVID-19 негізінен қызмет көрсету нарығына әсер етті. Ағымдағы жылғы 1-тоқсанның қорытындысы бойынша қызметтер экспорты 21,2% - ға немесе $1,5-тен $1,2 млрд-қа дейін қысқарды.

"Шикізаттық емес экспорттың көлемін ұлғайту үшін экспортқа бағдарланған тікелей шетелдік инвестицияларды тарту қажет", - деп атап өтті Бақыт Сұлтанов.

Министр экспортты одан әрі ілгерілету мәселесін көтерді. Ол Үкімет басшысы Асқар Маминге инвестицияларды тарту мәселелеріне жетекшілік ететін әкімдіктердің бірінші басшыларының орынбасарларына экспортты дамыту жауапкершілігін бекіту ұсынысымен жүгінді.

Сонымен қатар, Министр инвестициялық жобаларды келісу үшін шарттардың бірі шикізаттық емес тауарлардың экспортқа бағдарлануы болуы тиіс екенін айтты.