Жоғары вольтты қауіпсіздік: жоғары вольтты жабдыққа қойылатын міндетті талаптар

Қазақстан Республикасында ҚР Өнеркәсіп және құрылыс министрінің м.а. 2025 жылғы 7 қарашадағы № 481 бұйрығымен «Жоғары вольтты жабдықтардың қауіпсіздігіне қойылатын талаптар» техникалық регламенті бекітілді. Осы бұйрық алғашқы ресми жарияланған күнінен бастап алты ай өткен соң қолданысқа енгізіледі.

Техникалық регламент Қазақстан Республикасының аумағында айналымға шығарылатын жоғары вольтты жабдықтың қауіпсіздігіне оның өмірлік циклінің барлық кезеңдерінде: жобалау мен өндіруден бастап пайдалануға, сақтауға, тасымалдауға және кәдеге жаратуға дейінгі міндетті талаптарды белгілейді.

Регламент электр энергиясын өндіруге, түрлендіруге, беруге және таратуға арналған жоғары вольтты жабдыққа, оның ішінде тарату құрылғыларына, трансформаторларға, реакторларға, конденсаторларға және техникалық регламентті қолдану саласында көрсетілген жабдықтың өзге де түрлеріне қолданылады.Техникалық регламент:

- адам өмірі мен денсаулығының, мүліктің және қоршаған ортаның қауіпсіздігін қамтамасыз ететін жоғары вольтты жабдықтың дизайны мен сипаттамаларына қойылатын талаптар;

- Қазақстан Республикасының нарығында жоғары вольтты жабдықтардың айналысы қағидалары;

- өнімді сәйкестік белгісімен таңбалауға қойылатын талаптар;
техникалық регламент талаптарына сәйкестігін растау тәртібі;

- белгіленген талаптарды кезең-кезеңімен енгізуді қамтамасыз етуге бағытталған өтпелі ережелер.

Техникалық регламент талаптарын сақтау, оның ішінде бекітілген Тізбеге енгізілген өзара байланысты стандарттарды ерікті негізде қолдану арқылы қамтамасыз етіледі.

Техникалық регламент 2026 жылғы маусымда күшіне енеді, бұл нарық қатысушыларына өз қызметі мен өнімдерін белгіленген талаптарға сәйкес келтіру үшін қажетті өтпелі кезеңді қамтамасыз етеді.

Техникалық регламентті қабылдау жоғары вольтты жабдықтың қауіпсіздік деңгейін арттыруға, Қазақстан Республикасының аумағында бірыңғай міндетті талаптарды қалыптастыруға, сондай-ақ осы өнімнің айналымы саласында ашық реттеу үшін жағдайлар жасауға бағытталған.