Өнімнің сәйкестігі туралы сертификаттар мен декларацияны алу кезіндегі алаяқтық схемалар

Қазақстан Республикасы Сауда және интеграция министрлігі Техникалық реттеу және метрология комитеті ресми мемлекеттік eokno.gov.kz. сайтының көшірмесін жасап, соған ұқсас   жалған интернет-ресурстардың анықталғаны туралы хабарлайды.

Осы бұзушылықтарға қарсы іс-қимыл бойынша бірлескен шараларды әзірлеу мақсатында ағымдағы жылдың 27 тамызында мемлекеттік, құқық қорғау органдары мен бизнес өкілдерінің қатысуымен жұмыс кеңесі өтті.

Алаяқтық мақсатта ұқсас домендік атауы бар жалған сайт құрып (eoknogov.kz), онда жалған QR кодтармен сертификаттар мен сәйкестік декларациялары таратылуда. Бұл ресурстардың ресми мемлекеттік жүйелерге қатысы жоқ және азаматтар мен бизнесті адастыруға бағытталған.

Осыған байланысты барлық кәсіпкерлер мен тұтынушыларды құжаттарды тексеру және мемлекеттік онлайн-сервистерді пайдалану кезінде қырағылық танытуға шақырамыз. Сәйкестік сертификаттары мен декларациялары туралы сенімді мәліметтер тек ғана ресми ресурста орналастырылады: eokno.gov.kz, techreg.gov.kz.

Құрметті азаматтар мен кәсіпкерлер! Комитет қырағы болуды және ақпаратты тек ресми ақпарат көздері арқылы тексеруді ұсынады. Күмән туындаған кезде сенімсіз сайттар мен құжаттарды пайдаланудан бас тарту керек.

Қолданыстағы заңнамаға сәйкес сәйкестік туралы сертификаттар мен декларацияларды сәйкестікті растау жөніндегі аккредиттелген органдар ресімдеуге және беруге құқылы. Аккредиттеу субъектілері туралы өзекті ақпарат сайтта орналастырылған: nca.kz.