Өнеркәсіп және құрылыс министрлігінде сыбайлас жемқорлыққа қарсы шектеулерді сақтау мәселелері бойынша семинар өтті
2026 жылғы 13 тамызда Қазақстан Республикасы Өнеркәсіп және құрылыс министрлігінде Әдеп жөніндегі уәкілетті өкілдің жұмыс жоспарын іске асыру шеңберінде ойынға тәуелділіктің алдын алу және құмар ойындарға қатысуға жауапты көзқарасты қалыптастыру мәселелеріне арналған оқыту семинары өтті.
Семинарда лектор ретінде экономика ғылымдарының кандидаты, доцент, психолог, гештальт-терапевт, дағдарыстық жағдайлар және тәуелді мінез-құлық саласындағы маман Қайрат Қуанышбайұлы Нұрмағанбетов сөз сөйледі.
Семинар барысында ойынға тәуелділіктің қалыптасу психологиялық тетіктері, оның пайда болуына ықпал ететін негізгі факторлар, сондай-ақ патологиялық ойын мінез-құлқының даму кезеңдері қарастырылды. Лудоманияның адамның эмоционалдық жағдайына, отбасылық қарым-қатынасына, кәсіби қызметіне және әлеуметтік бейімделуіне әсеріне ерекше назар аударылды.
Қатысушыларға ойынға тәуелділіктің әртүрлі кезеңдеріне тән белгілер түсіндірілді. Олар бастапқы қызығушылық пен ойынға тұрақты қажеттіліктің қалыптасуынан бастап мінез-құлықты бақылауды жоғалтуға, қаржылық және әлеуметтік проблемалардың туындауына, жақындарымен қарым-қатынастың нашарлауына және кәсіби қызметке теріс әсер етуге дейінгі үдерістерді қамтиды.
Семинардың жеке бөлігі мемлекеттік қызметшілер арасында ойынға тәуелділіктің алдын алуға арналды. Құмар ойындарға қатысу саласында заңнамада белгіленген шектеулер, сондай-ақ сыбайлас жемқорлыққа қарсы талаптар мен қызметтік әдеп нормаларын сақтаудың маңызы қарастырылды.
Практикалық бөлімде қатысушыларға проблемалық ойын мінез-құлқының белгілерін өз бетінше бағалауға арналған сұрақтар ұсынылды. Олар адамның құмар ойындарға, уақыт пен қаржыға, кәсіби міндеттеріне және отбасылық қарым-қатынастарына деген көзқарасындағы ықтимал өзгерістерге назар аударуға мүмкіндік береді.
Мұндай іс-шараларды өткізу мемлекеттік қызметшілердің құқықтық және психологиялық сауаттылығын арттыруға, тәуелді мінез-құлықтың алдын алуға, жауапты мінез-құлық мәдениетін нығайтуға, қызметтік әдеп талаптары мен сыбайлас жемқорлыққа қарсы шектеулердің сақталуына бағытталған.
Министрлік қызметкерлердің кәсіби қызметіне, жеке әл-ауқатына және іскерлік беделіне теріс әсер етуі мүмкін тәуекел факторлары туралы хабардарлығын арттыруға бағытталған ақпараттық-түсіндіру және профилактикалық іс-шараларды одан әрі жалғастырады.