Қазақстанда ТИМСО енгізу және BIM-ді міндетті қолдану мәселелері бойынша Астанада сараптамалық кездесу өтті
2026 жылғы 29 шілдеде Астана қаласында «Қазақстандағы міндетті BIM» тақырыбында сараптамалық кездесу өтті. Іс-шараны «CAD системы» ЖШС ұйымдастырды.
Кездесуге жобалау және құрылыс ұйымдарының өкілдері, тапсырыс берушілер, BIM-менеджерлер, салалық сарапшылар мен құрылыс саласының мамандары, сондай-ақ «Мемсараптама» РМК-нің өкілдері қатысты. Кездесу құрылыс объектілерін ақпараттық модельдеу технологиясын (ТИМСО) енгізудің практикалық мәселелерін талқылауға, қолданыстағы нормативтік базаны қолдану ерекшеліктерін қарастыруға және инвестициялық-құрылыс процесіне қатысушылар арасында тәжірибе алмасуға арналған кәсіби алаңға айналды.
Іс-шара ашық «сұрақ-жауап» форматында өтті. Спикер ретінде «Мемсараптама» РМК-нің даму және BIM-технологиялар бөлімінің бас маманы Сакен Қашкимбаев сөз сөйлеп, қатысушылардың өзекті сұрақтарына жауап берді және құрылыс объектілерін ақпараттық модельдеу технологиясын қолдану арқылы әзірленген жобалардың кешенді ведомстводан тыс сараптамадан өтуінің практикалық аспектілері туралы баяндады.
Кездесу барысында қатысушылар 2026 жылғы 19 наурыздағы №114 «Құрылыс объектілерін құру және пайдалану кезінде құрылыс объектілерін ақпараттық модельдеу технологиясын қолдану міндетті болып табылатын құрылыс объектілері түрлерінің тізбесін бекіту туралы» бұйрық талаптарын, ТИМСО қолданылып әзірленген жобалардың сараптамадан өту тәжірибесін, тапсырыс берушінің ақпараттық талаптарын, Qportal жүйесін жалпы деректер ортасы ретінде пайдалануды, IFC ашық форматының артықшылықтарын, нормативтік талаптарды жетілдіру мәселелерін, сондай-ақ құрылыс объектісінің электрондық моделін әзірлеу кезінде қолданылатын бағдарламалық қамтамасыз ету құралдарын талқылады.
Кешенді ведомстводан тыс сараптамадан өту барысында ақпараттық модельдерді дайындау және ұсыну, құрылыс объектісінің электрондық моделінің құрылымы мен мазмұнына қойылатын талаптар, сондай-ақ инвестициялық-құрылыс процесіне қатысушылар арасында деректер алмасуды қамтамасыз ету мәселелеріне ерекше назар аударылды.
Сараптамалық кездесу сарапшылар қауымдастығы мен құрылыс саласы өкілдері арасында кәсіби тәжірибе алмасуға мүмкіндік беретін тиімді алаң болды. Қатысушылар мұндай іс-шараларды өткізудің ТИМСО қолданудың бірыңғай тәсілдерін қалыптастыру, нормативтік базаны жетілдіру және Қазақстан Республикасының құрылыс саласын цифрлық трансформациялау үшін маңыздылығын атап өтті.
Ұйымдастырушылар алдағы уақытта да кәсіби қауымдастықты дамытуға, нарық қатысушыларының құзыреттерін арттыруға және Қазақстанның құрылыс саласында ақпараттық модельдеу технологияларын практикалық тұрғыда енгізуге бағытталған сараптамалық кездесулер өткізуді жоспарлап отыр.