2025 жылы 15 мыңнан астам қазақстандық жалға берілетін тұрғын үйді жекешелендірді

2025 жылы 15 мыңнан астам азамат бұрын бөлінген жалға берілетін тұрғын үйді «сатып алу құқығынсыз» жекешелендіру құқығын пайдаланды. Олардың шамамен 9 мыңы тұрғын үйді тегін алды. Бұл туралы Орталық коммуникациялар қызметінде өткен баспасөз конференциясында Қазақстан Республикасы Өнеркәсіп және құрылыс министрлігінің Құрылыс, тұрғын үй және коммуналдық шаруашылық істері комитетінің төрағасы Бақытжан Жүнісбеков мәлімдеді.

Ол мемлекеттік қолдаудың қосымша шараларына тұрғын үй жалдау ақысының бір бөлігін субсидиялау және тұрғын үй сертификаттарын беру кіретінін атап өтті.

«11 мыңнан астам азамат субсидияларды пайдаланды, бұл мақсаттарға республикалық бюджеттен 7,6 млрд теңге бөлінді. 2026 жылы 11 мың азаматқа жалдау ақысын субсидиялау жоспарлануда», - деді Бақытжан Жүнісбеков.

Оның айтуынша, 2025 жылы 1 733 азамат алғашқы жарнасын жабу үшін жалпы сомасы 2 млрд теңгеге тұрғын үй сертификаттарын алды.

«Биыл жергілікті бюджеттен 3,5 мың сертификат беруге 4,3 млрд теңге бөлінді», - деп қосты ӨҚМ Құрылыс, тұрғын үй және коммуналдық шаруашылық комитетінің төрағасы.