Қуандық Қажкенов Абай облысындағы сумен қамтамасыз ету жобаларының іске асырылу барысымен танысты

Абай облысына жұмыс сапары барысында ҚР Өнеркәсіп және құрылыс вице-министрі Қуандық Қажкенов орталықтандырылған сумен жабдықтауға 100% қолжетімділікті қамтамасыз етуге бағытталған жобалардың іске асырылу барысымен танысты. Сапар барысында вице-министр Семей қаласы мен облыс аудандарында құрылыс және реконструкция жұмыстары жүргізіліп жатқан төрт нысанды аралады.

Бірінші нысан – Семей қаласындағы 2-Водная, Клубный және Шлеева көшелеріндегі су құбыры желілерін салу жобасы болды. Жоба 11 621 метр желіні тұрғын үйлерге қосумен монтаждауды қарастырады. Қазіргі уақытта 8 253 метр желі дайын. Вице-министр әкімдікке жұмыс қарқынын күшейтуді, жұмысшылар мен техника санын арттыруды және нысанды күнделікті бақылауда ұстауды тапсырды. Жоба нәтижесінде 400-ден астам тұрғын орталықтандырылған су құбырымен қамтамасыз етіледі.

Келесі нысан – Талица ауылында салынып жатқан су құбырлары желілері мен су алу құрылысы. 6 635 метр желі толық монтаждалған. Құрылыс жұмыстары су алу құрылысында, сорғы станциясында, электр желілерінде және жабдық орнатуда жалғасуда. Қуандық Қажкенов жергілікті атқарушы органдарға жобаны биылғы жылы аяқтау үшін күнделікті бақылау жүргізуді және қажетті ресурстарды қамтамасыз етуді тапсырды. Жоба аяқталғаннан кейін ауылдың 738 тұрғыны суменқамтамасыз етіледі.

Бородулихин ауданында ол Переменовка (Ремки) ауылындағы су құбыры желілерін салу нысанын аралады. Жоба 34 220 метр желі салуды және су алу құрылысын тұрғызуды көздейді. Қазіргі таңда 25 000 метрден астам құбыр тартылды, сорғы станцияларының құрылысы басталды. Жобалаушылар мен техникалық бақылау нормаларды қатаң сақтау керектігіне міндеттелді. Жоба аяқталғаннан кейін 766 тұрғын сумен қамтамасыз етіледі.

Соңғы нысан, Бесқарағай ауданындағы Башкуль ауылында су құбыр желілерін салу және реконструкциялау болды. Жұмыстар 10 600 метр су құбыры желісін салу және су алу құрылысын тұрғызуды қамтиды. Қазіргі кезде 10 400 метр құбыр тартылып, жарықтандыру негіздері үшін топырақ жұмыстары жүргізілуде, су мұнарасы, №2 сорғы станциясы, таза су резервуарларын монтаждау және қоршаулар салу жұмыстары жүргізілуде. Жоба аяқталғаннан кейін 420 тұрғын орталықтандырылған су жүйесімен қамтамасыз етіледі.

Жұмыс сапарының қорытындысы бойынша вице-министр құрылыс-монтаж жұмыстарының қарқынын жеделдетуге және нысандарды уақытында пайдалануға беру бойынша қосымша тапсырмалар берді. Министрлік өңірдегі су қамтамасыз ету жобаларының іске асырылуын бақылауды жалғастыра береді.