«MiningWeek Kazakhstan'2025» 20-шы халықаралық көрмесі аясында дөңгелек үстел өткізілді

Бүгін Қарағанды қаласында «MiningWeek Kazakhstan'2025» тау-кен металлургия кешеніне арналған технологиялар мен жабдықтардың және жер қойнауын ұтымды пайдаланудың 20-шы халықаралық көрмесі аясында дөңгелек үстел өткізілді. Іс-шара ғылыми қоғамдастық өкілдерінің, озық технологияларды өндірушілер мен әзірлеушілердің қатысуымен, «Қазақстан Республикасының минералдық шикізатты кешенді қайта өңдеу жөніндегі ұлттық орталығы» РМК «Ж. Әбішев атындағы химия-металлургия институты» филиалы ғалымдарымен ұйымдастырған.

Дөңгелек үстел экологиялық жауапкершілік пен технологиялық тиімділікке қойылатын талаптардың өсуі жағдайында қорытпаларды өндірудегі дәстүрлі тәсілдерді қайта қарастыру мәселелеріне арналған.

Талқылаудың басты тақырыптарының бірі кешенді қорытпаларды, атап айтқанда алюмосиликохром мен ферромарганецті балқыту технологияларын коммерцияландыру болды. Бұл қорытпалар тек металлургиялық ғана емес, сонымен қатар стратегиялық қызығушылық тудырады, өйткені олар табиғи және техногендік шикізатты пайдалануға, сондай-ақ процестерді «жасыл» экономиканың талаптарына бейімдеуге мүмкіндік береді.

Көміртегі ізін азайтуға бағытталған технологиялық инновациялар ерекше қызығушылық тудырды. Олар төмен көміртекті феррохромды балқыту технологиясын әзірлеуді қамтиды. Технологияның негізгі элементі — экзотермиялық жағдайларды және процестің жоғары энергия тиімділігін қамтамасыз ететін тотықсыздандырғыш ретінде ферроалюмосиликокальцийді (ФАСК) қолдану.

Дөңгелек үстел тек ғылыми алмасу алаңына ғана емес, сонымен қатар өнеркәсіптік серіктестермен байланыс нүктесіне айналды. «Қарағанды металл конструкциялары зауыты – Имсталькон» ЖШС (ҚМК) өкілдері Ж. Әбішев атындағы химия-металлургия институтымен өзара іс-қимылдың тамаша деңгейін атап өтіп, жаңа ферроқорытпаларды әзірлеу және енгізу үшін сараптамалық алаң ретінде институтты одан әрі қатыстыруға қызығушылық танытты. Ғылым мен өндіріс арасындағы мұндай диалог тараптардың тұрақты даму қағидаттарында технологиялық міндеттерді бірлесіп шешуге дайындығын көрсетеді.

Өткізілген дөңгелек үстел металлургияны декарбонизациялауды қамтамасыз етудегі ғылыми зерттеулердің маңыздылығына назар аударып, сондай-ақ төмен көміртекті металлургия өндірісінің халықаралық күн тәртібіндегі отандық әзірлемелердің өсіп келе жатқан рөлін растады.