Қазақстан «жасыл» алюминий өндіру кластерін құруды жоспарлап отыр

Өнеркәсіп және құрылыс министрі Ерсайын Нағаспаев Қытайдың East Hope Group корпорациясы директорлар кеңесінің төрағасы Лю Юнсинмен келіссөз жүргізді. Тараптар Қазақстанда алюминий өндіру бойынша тігінен біріктірілген өндірістік кешен құру бойынша ауқымды инвестициялық жобаны іске қосу перспективаларын қарастырды.

Бастама аясында Қостанай және Ақтөбе облыстарында 11 боксит пен көмір кен орнын игеру жоспарлануда. Жоба қуаттылығы жылына 6 млн тонна құрайтын тау-кен байыту комбинатының, жылына 3 млн тонна алюминий өндіретін электролиз зауытының, сондай-ақ белгіленген қуаты 4,5 ГВт көмірмен жұмыс істейтін ЖЭС құрылысын қамтиды. Шикізат жеткізуге ERG тарту және жобаға бірлесіп қатысу мүмкіндігі қарастырылуда.

Инвестиция көлемі 12 миллиард АҚШ долларынан асады. 10 мыңға жуық тұрақты жұмыс орны ашылады деп күтілуде. Экологиялық таза технологиялар мен айналмалы экономика қағидаттарын пайдалануға ерекше назар аударылатын болады.

Жер қойнауын пайдалану, сондай-ақ жұмыс істеп тұрған кәсіпорындармен ықтимал өзара іс-қимыл мәселелеріне ерекше назар аударылды. Болашақ учаскені «Павлодар» АЭА аумағына біріктіру немесе жеке қосалқы аймақ құру мәселесі қарастырылуда. Министрлік ұйымдық-құқықтық мәселелерді шешуге, оның ішінде арнайы экономикалық аймақтың қызмет ету мерзімін ұзартуға жан-жақты көмек көрсетуге дайын екенін білдірді.

Лю Юнсин Қазақстанның Еуразияның индустриялық орталығы ретіндегі стратегиялық маңыздылығын атап өтті. Ол «жасыл» алюминий, энергетика және агроөнеркәсіп салаларындағы East Hope Group-тың ұзақ мерзімді жобалары үшін елдің тартымдылығының негізгі факторлары ретінде бай ресурстық базаның және технологиялық жаңғыртудың тұрақты курсының болуын атап өтті.

 

Анықтама:

East Hope Group – түсті металлургия, полисилиций өндірісі, жаңартылатын энергия көздері және жоғары технологиялар (әлемдегі алғашқы 10-ға кіреді) салаларында жобаларды жүзеге асыратын Қытайдағы ірі өнеркәсіптік корпорациялардың бірі.