Беларусь әскери қызметшілері Қазақстан Қарулы күштеріндегі сержанттар дайындау тәжірибесін зерделеді

ҚР Қорғаныс министрлігіне Беларусь Қарулы күштері Жауынгерлік дайындық бас басқармасының бастығы генерал-майор Владимир Белый бастаған шетелдік делегация келді.

Жұмыс кездесуі ҚР Қарулы күштерінің Ұлттық әскери-патриоттық орталығында өтті.

Бас сержант – ҚР Қарулы күштері Бас штабы Сержанттар құрамымен жұмыс басқармасының бастығы шебер-сержант Темірбек Халықов Беларусь қорғаныс ведомствосының өкілімен сержанттар корпусын дамыту және қатардағы жауынгерлер мен мамандарды даярлауды ұйымдастыру мәселелерін талқылады.

 – Біз Беларусь әріптестерін сержанттық корпустың қалыптасу және даму кезеңдерімен таныстырдық, – деді шебер-сержант Т. Халықов. – Сержанттарды іріктеу, тағайындау және даярлауды ұйымдастыру жүйесі, оның ішінде мамандық бойынша да айтылды.

Сондай-ақ, Беларусьтен келген меймандар кәсіби сержанттарды даярлайтын ҚР Қорғаныс министрлігінің Шоқан Уәлиханов атындағы әскери колледжінде болды.

Жұмыс кездесуі Қазақстан мен Беларусь Қорғаныс министрліктері арасындағы екіжақты ынтымақтастық жоспарына сәйкес ұйымдастырылды.