Радиоэлектроника және байланыс әскери-инженерлік институтында мемлекеттік аттестаттау комиссиясы жұмысын бастады

Комиссия бір ай ішінде әскери оқу орны түлектерінің білім деңгейі мен машықтарын бағалайтын болады.

Комиссия құрамына ҚР Қарулы күштері Бас штабының, Әуе қорғанысы күштері бас қолбасшысы басқармасының және Әуе шабуылына қарсы қорғаныс әскерлері қолбасшысы басқармасының өкілдері кірді.

Кешенді мемлекеттік емтихан екі кезеңде өткізіледі. Оның біріншісінде курсанттардың теориялық білімі тексерілсе, екінші кезеңде қару-жарақ пен әскери техниканы қолдана отырып, алған дағдыларын практикалық тұрғыда дәлелдейді. Сонымен бірге мемлекеттік емтиханда дене дайындығы да шешуші рөл атқарады. Онда оқуды аяқтаушы курсанттардың жылдамдығы, ептілілігі, күш-жігері және төзімділігі тексеріледі.

– Бұл оқу бағдарламаларын меңгеру дәрежесі анықталатын, алған мамандыққа сәйкес теориялық білімі де, практикалық дағдылары да тексерілетін өте жауапты кезең, – деп атап өтті әскери жоғары оқу орнының бастығы генерал-майор Қайрат Даутов.

Биыл әскери институтты 87 адам бітіріп шығады. Олардың біреуі үздік дипломнан үміткер. Институт тарихында алғаш рет «Радиоэлектрондық барлау және радиоэлектрондық күресті ұйымдастыру» біліктілігі бар офицерлер оқуды аяқтайын деп отыр.

Институт радиоэлектроника, радиотехника және инжиниринг, автоматтандыру және инфокоммуникациялық технологиялар, ақпараттық қауіпсіздік және киберқауіпсіздік жүйелері, әскери дирижерлік, әскери журналистика, сондай-ақ әскери құрылыс бойынша мамандар даярлайды.

Осы жылдан бастап әскери институт төрт жылдық білім беруге көшуде. Әскери оқу орнын бітірген соң түлектерге жоғары білім туралы диплом мен «лейтенант» әскери атағы беріледі.