Атыстан аты аңызға айналған мерген Төлеуғали Әбдібековті еске алуға арналған жарыс өтті

Алдағы Отан қорғаушылар күніне орай Жамбыл облысындағы «Оңтүстік» өңірлік қолбасшылығының «Айша бибі» полигонында атыстан жарыс өтті.

Іс-шараға он бес команда құрамында жүздің үстінде адам, атап өтсек, «Оңтүстік» өңірлік қолбасшылығына қарайтын барлық гарнизондарының әскери қызметшілері, ҰҚК Шекара қызметінің, Ұлттық ұланның, Жамбыл облысының Полиция, Қылмыстық-атқару жүйесі департаменттерінің өкілдері және Қарулы күштердің ардагерлері қатысты.

Ұйымдастырушылар жарысты Ұлы Отан соғысы жылдарында 400-ге жуық фашистің көзін жойған мерген, Халық Қаһарманы Төлеуғали Әбдібековті еске алуға арнады.

– Кәсіби мереке қарсаңында біздің «Оңтүстік» ӨңҚ түрлі күш құрылымдарының өкілдері арасында атыстан жарыстар өткізуді жақсы дәстүрге айналдырды, – деп атап өтті «Оңтүстік» ӨңҚ қолбасшысының жауынгерлік даярлық жөніндегі орынбасары полковник Бауыржан Күренкеев. – Мұндай жарыстар спорттық шеберлікті арттыруға және әскери рухты нығайтуға ықпал етері сөзсіз. 

Сайыс нәтижесіне келсек, Калашников автоматынан атудан командалық есепте үздік үштіктің барлық тұғырын турнир иелері иемденді. Бірінші орында – «Оңтүстік» ӨңҚ Жаркент гарнизонының әскери қызметшілері, екінші орында – Луговой гарнизонының жауынгерлері, үшінші орында – Гвардейск гарнизонының командасы.

Макаров тапаншасынан атуда ҰҚК Шекара қызметі департаментінің әскери қызметшілері командалық есепте жеңіске жетті. Екінші орынды – Шымкент гарнизонының құрамасы, үшінші орынды – «Оңтүстік» ӨңҚ әскерлері қолбасшысының басқармасы еншіледі.

Сондай-ақ, жеке есепте үздік деп танылған жеңімпаздар мен жүлдегерлерге медальдар мен наградалар табысталды.

– Қарсыластар да мықты болды, соған қарамастан жеңіске жету маңызды, – деп атап өтті Жамбыл облысы ҰҚК Шекара қызметі департаментінің жауынгерлік дайындық және әскерлер қызметі басқармасының бастығы полковник Тимур Тайсеңгіров. – Отан қорғаушылар күні мен Жеңіс күні қарсаңында осындай жарыс ұйымдастырғаны үшін «Оңтүстік» өңірлік қолбасшылығының басшылығына ризашылығымды білдіргім келеді.

Жарыс салауатты бәсекелестікті көрсетті. Қатысушылардың пікірінше, мұндай іс-шаралар ведомствоаралық қарым-қатынасты дамытуға, жауынгерлер арасындағы достық пен әскери серіктестікті нығайтуға ықпал етпек.