Жас сарбаздықтарға алғаш рет іс жүзінде оқ ату ұйымдастырылды

№ 95 мектептің «Жас сарбаз» сыныптарының оқушылары, «Киров» және полковник Борис Керімбаев атындағы әскери-патриоттық клубтардың тәрбиеленушілері Алматы қаласында өткен әскери-далалық жиынға қатысты.

Іс-шара «Айтей» полигонында Алматы облысы Практикалық атыс федерациясының вице-президенті Анатолий Бычковтың жетекшілігімен өтті. Жиынға 12 жастан 17 жасқа дейінгі оқушылар қатысты.

– «Жас сарбаз» қозғалысының тәрбиеленушілеріне арналған мұндай жиын алғаш рет өткізіліп отыр. Оны жүйелі түрде өткізу қажет, – деп алдағы жоспарымен бөлісті Алматы қаласындағы № 95 жалпы білім беретін мектептің «Жас сарбаз» сыныптарының әскери жетекшісі Бақытжан Перімбет.

Жиында 12-13 жас аралығындағы оқушылар 20 метр қашықтықта пистолеттік калибр карабинінен оқ атуды орындады. Ал 14 жастан асқан жасөспірімдер болса 50 метрге Калашников автоматынан оқ атты.

Сондай-ақ, жас сарбаздықтарға «Калашников» атыс қаруының бірнеше түрі – ВПО-285 пистолеттік калибр карабині, АР-15 және «Сайга 04» карабиндері көрсетілді. Балалар аңызға айналған Мосин мерген мылтығымен де танысты. Ұлы Отан соғысы жылдары бұл қарумен Кеңес Одағының Батыры Әлия Молдағұлова атқан болатын.