Қорғаныс министрі Қарулы күштердің жеке құрамын Конституция күнімен құттықтады

Қазақстан Қарулы Күштерінің барлық әскери бөлімдері мен басқару органдарында Ата Заңның қабылданғанына 27 жыл толуына арналған салтанатты іс-шаралар өтті.

Мерекелік іс-шаралар барысында Қазақстанның қарқынды дамуы үшін Конституцияның негізін қалаудағы, сондай-ақ елдің егемендігі мен аумақтық тұтастығын қамтамасыз етудегі Қарулы күштердің маңызды рөлі атап өтілді.

Қорғаныс ведомствосында өткен салтанатты жиында Қорғаныс министрі генерал-полковник Руслан Жақсылықов қарулы күштердің ардагерлерін, әскери қызметшілерді және азаматтық персоналын мемлекеттік мерекемен құттықтап, Конституция қоғамдық дамудың демократиялық қағидаттарының кепілі екенін атап өтті.

– Қазақстан Республикасының Ата Заңында көрініс тапқан жалпыұлттық құндылықтарды құрметтеу – ортақ парызымыз. Конституцияда жарияланған қағидаттарды басшылыққа ала отырып, Қарулы күштердің әскери қызметшілері кәсіби біліктілігімен, әскери борышын адал орындауымен еліміздің дамуы мен гүлденуіне баға жетпес үлес қосуда, – деп атап өтті қорғаныс ведомствосының басшысы.

Салтанатты іс-шаралар аясында Қазақстанның қорғаныс қабілетін нығайтуға елеулі үлес қосып келе жатқан Қарулы күштердің ардагерлері, үздік әскери қызметшілер мен азаматтық персонал марапатталды.

 Жиын соңында Ұлттық әскери-патриоттық орталығының шығармашылық ұжымы шараға қатысушыларға мерекелік концертпен, тамаша көңіл-күй сыйлады.