Алматы қаласындағы Қазақстан Республикасы Қорғаныс министрлігінің бітімгерлік даярлық орталығында «Батыс Африкада тұрақтылықты қамтамасыз ету жөніндегі бітімгершілік операцияларына логистикалық қолдау көрсету» тақырыбында логистика саласындағы офицерлерді даярлауда компьютерлік командалық-штабтық оқу-жаттығу өтті.
Оқу-жаттығудың негізгі мақсаты қарулы күштерді жан-жақты қамтамасыз ету мәселелері бойынша мамандардың білімдері мен дағдыларын жетілдіру, бітімгершілік миссиясы өтіп жатқан жерге әскери контингентті өз бетінше жіберуді ұйымдастыру және оны логистикалық қолдау тәртібін зерделеу болды.
Жаһандағы санитарлық-эпидемиологиялық жағдайға қарамастан, АҚШ-тық әріптестеріміз оқу-жаттығуларға қатысып, БҰҰ-ның миссияларына қатысатын Қазақстан Қарулы Күштерінің бітімгерлерін даярлауға қомақты үлес қосқанына қуаныштымыз. Бұл платформа біздің әскери қызметшілерді даярлауға жақсы мүмкіндік, – деп атап өтті Қазақстан Қарулы Күштерінің Тыл және қару-жарақ бастығы генерал-майор Алмас Ахмадиев.
Аталған оқу-жаттығу басқару органдарының 2021 жылға арналған дайындық жоспарына сәйкес және екі елдің қорғаныс ведомстволары арасындағы әскери ынтымақтастықтың 2018-2022 жылдарға арналған бесжылдық жоспары шеңберінде ұйымдастырылды.