Қорғаныс министрі «Алтын жебе» арнайы операциялар күштерінің компоненттерін кешенді тексеру барысын қадағалады

Ақтау гарнизонында қорғаныс ведомствосының басшысы арнайы операциялар күштерінің құрамдарын тексерудің екінші кезеңі өтіп жатқан оқу-жаттығу полигондарын аралады.

Бұл тексеру Құрлық әскерлерінің, Әуе қорғанысы күштерінің және Әскери-теңіз күштерінің бөлімшелерін қамтыды.

Генерал-лейтенант Нұрлан Ермекбаев 2020 жылы әскерлерге жауынгерлік оқу-жаттығудың маңызды бағыты ретінде енгізілген, тактикалық атыс жаттығуларын орындау барысымен танысты.

Бұдан өзге, тексеруге суға десант түсіру мен кемелердің диверсиясына қарсы шараларды орындайтын бөлімшелердің жауынгер жүзгіштері де қатысты. Ал Әскери-әуе күштерінің армия авиациясы осы кезде жеке құрамды жеткізу мен десант түсіру міндеттерін орындайды.

Жуырда әскерлерде жеңіл техникамен тікұшақтардан десант түсіру тәсілдері, сондай-ақ төтенше жағдайларда психологиялық тұрақтылықты арттыру бойынша арнайы жаттығулар пысықталғанын айта кеткен жөн.

Сонымен қатар, Қорғаныс министрі гарнизонның әскери бөлімдерінің қоймаларында қару-жарақ пен оқ-дәрілерді сақтаудың ұйымдастырылуын тексерді.

Қорғаныс ведомствосының басшысы әсіресе, өрт пен диверсияға қарсы қауіпсіздіктің жай-күйіне, техникалық күзет құралдарының дұрыстығына, сондай-ақ сақтау объектілерінде қарауылдық қызметті ұйымдастыруға назар аударды.