Алматыда Әскери клиникалық госпиталь 85 жылдығын атап өтті

Қазақстан Республикасы Қорғаныс министрлігінің Әскери клиникалық госпиталі мерейтойлық 85 жылдығын атап өтті. Ғасырға жуық уақыт ішінде госпиталь елеулі даму жолынан өтіп, отандық әскери медицинаның дәстүрлерін сақтай отырып, әскери қызметшілер мен Қарулы күштердің ардагерлеріне сапалы медициналық көмек көрсету үшін берік негіз қалыптастырды.

Госпиталь тарихы – медицина саласындағы бірнеше буын мамандардың еңбегі, кәсібилігі, жауапкершілігі мен дәрігерлік парызға адалдығының көрінісі. Бүгінде жинақталған тәжірибе заманауи технологиялармен және диагностика мен емдеудің озық әдістерімен ұштасып келеді.

Госпиталь әскери медицина жүйесіндегі жетекші көпсалалы медициналық мекемелердің бірі саналады. Мұнда медицинаның кең ауқымды бағыттары бойынша мамандандырылған көмек көрсетіледі. Заманауи диагностикалық және емдеу бөлімшелері, операциялық блок, реанимация және қарқынды терапия бөлімі, сондай-ақ медициналық оңалту қызметтері жұмыс істейді.

Материалдық-техникалық базаны жаңғырту госпитальді дамытудың маңызды бағыттарының бірі болып қала береді. Қазіргі уақытта медициналық мекемеде заманауи диагностикалық және оңалту жабдықтары қолданылады. «Артромот К1» аппараты тізе және жамбас буындарына жасалған жарақаттар мен операциялардан кейін пациенттерді пассивті оңалтуға мүмкіндік береді. «Кардиан-СДМ» кешендері ЭКГ мен артериялық қысымды тәулік бойы бақылауды қамтамасыз етеді. Ал 19 арналы «Нейрон-Спектр-3» электроэнцефалографы мидың биоэлектрлік белсенділігін зерттеу мүмкіндігін кеңейтеді. Реанимация және қарқынды терапия бөлімі пациенттердің өмірлік маңызды көрсеткіштерін үздіксіз бақылауға арналған төрт төсек жанындағы монитормен жабдықталған.

Медициналық тәжірибені дамыту ғылыми және білім беру жұмыстарымен қатар жүреді. Госпиталь Алматыдағы жетекші медициналық жоғары оқу орындарының клиникалық базасы болып табылады. Мұнда болашақ мамандар практикалық даярлықтан өтіп, кәсіби тәжірибе алмасу жүзеге асырылады.

Бұл жұмыс госпитальдің 85 жылдығына орай ұйымдастырылған іс-шаралар аясында жалғасын тапты. Алматыда әскери медицина ардагерлері, Қазақстан мен Ресейден келген ғалымдар және практик дәрігерлердің қатысуымен республикалық ғылыми-практикалық конференция өтті. Іс-шара барысында әскери қызметшілерді медициналық қамтамасыз етудің өзекті мәселелері және әскери медицинаны одан әрі дамыту бағыттары талқыланды.

85 жылдық мерейтой госпиталь тарихындағы маңызды белеске айналды. Кәсіби дәстүрлер мен жинақталған тәжірибені сақтай отырып, ұжым медициналық қызметті жетілдіруді, заманауи технологияларды енгізуді және әскери қызметшілер мен ардагерлерге уақтылы әрі жоғары білікті медициналық көмек көрсетуді жалғастыруда.