Алты Hyundai Mufasa автокөлігін облыстық қорғаныс істері жөніндегі департаментіне табыс ету кәсіби мереке – Отан қорғаушы күніне арналған тамаша сыйлық болды.
Маңғыстау облысының әкімі Нұрдәулет Қилыбай мен ҚР Қарулы күштері Бас штабы Ұйымдастыру-жұмылдыру жұмысы департаментінің өкілі полковник Нұрлан Уәли жол талғамайтын көліктердің кілттерін беру салтанатына қатысты. Олар әскери қызметшілерді келе жатқан мерекемен құттықтап, қызметте табыс тіледі.
Жергілікті бюджет есебінен сатып алынған, Қазақстанда құрастырылған автокөліктер өңірдің қалалық және аудандық бөлімшелері үшін керемет тарту болды. Енді оларды әскерге шақыру науқандары мен әскерге шақыру жасына дейінгі балаларды отансүйгіштікке тәрбиелеуге бағытталған шараларды өткізуге пайдаланатын болады.
Оқу-әдістемелік жиын аясында ҚР Қарулы күштері Құрлық әскерлері бас қолбасшысының басқармасы ұшқышсыз ұшу аппараттары жүйесі операторларының жарысын ұйымдастырды.
Оған өңірлік қолбасшылықтар мен әскери оқу орындарының 25 командасы қатысты. Іс-шараны Қорғаныс министрі генерал-полковник Руслан Жақсылықов қорытындылады. Ол әскери қызметшілерді келе жатқан Отан қорғаушы күнімен құттықтап, қызметте табыс тіледі.
Қорғаныс ведомствосының басшысы қазіргі заманғы ұрыста маңызды артықшылық тудыратын ұшқышсыз ұшу аппараттарын пайдалану аясының әмбебаптығы мен кеңеюіне назар аударды.
Тапсырмаларды сәтті орындау үшін сала мамандарына жоғары дәлдік, техникалық сауаттылық, жылдам реакция және төтенше жағдайда шешім қабылдау мүмкіндігі қажет. Сіздер бұл кәсіби қасиеттерді жарыс барысында толық көрсете алдыңыздар, - деді Қорғаныс министрі.
Байқауға қатысушылар түрлі тапсырмаларды орындады. Оның ішінде дәл пилоттық және бағдарлар бойынша навигациядан бастап, барлау операцияларын жүргізу және шектеулі көріну жағдайындағы тапсырмалар бар. Жылдамдыққа, дәлдікке және күрделі жағдайда жұмыс істеу қабілетіне ерекше назар аударылды.
Жарыс қорытындысы бойынша "Мерген аспан аңшысы" номинациясын лейтенант Сүндетбай Дүйсенбаев (41433 әскери бөлімі) жеңіп алды. Екінші орынды ефрейтор Данияр Серікқанов (44736 әскери бөлімі), үшінші орынды лейтенант Диас Ескер (74261 әскери бөлімі) және кіші сержант Ақылбек Тыныштықов (25744 әскери бөлім) иеленді.
"Үздік маман-техник" номинациясы бойынша бірінші орынды сержант Ілияс Әбілқасов (30217 әскери бөлімі), "Үздік симулятор операторын" Құрлық әскерлері әскери институтының жауынгері кіші сержант Роман Смирнов иеленді.
Кіші сержант Ақылбек Тыныштықов "Епті аспан аңшысы" номинациясында да үздік нәтиже көрсетті. Екінші орынды аға лейтенант Жарас Қабыкеш (68665 әскери бөлімі), үшінші орынды сержант Ілияс Әбілқасов (30217 әскери бөлімі) алды.
"Ұшқышсыз авиациялық жүйелерді дамыту бойынша үздік өңірлік қолбасшылық" номинациясы "Шығыс" ӨңҚ-на берілді.
Жарыстың жеңімпаздары мен жүлдегерлеріне грамоталар, кубоктар және бағалы сыйлықтар табысталды.
Жеңіс күні қарсаңында Алматы облысы Іле ауданының және Алатау қаласының қорғаныс істері жөніндегі біріккен бөлімінің әскери қызметшілері, әскери-патриоттық клубтардың тәрбиеленушілері Ұлы Отан соғысының ардагері Тәңірберген Толғанбаевты 102 жасқа толған күнімен құттықтады.
Олар Қорғаныс министрі атынан ардагерге ерен еңбегі үшін асқан ризашылықтарын білдіріп, естелік сыйлықтар табыс етіп, оған зор денсаулық, ұзақ өмір және сергектік тіледі.
Тәңірберген Толғанбаев 1923 жылы 1 мамырда Талдықорған облысы, Ақсу ауданы, Киров колхозында дүниеге келген. 1942 жылы мамырда 19 жасар жігітті Ақсу аудандық әскери комитетімен Кеңес әскерінің қатарына шақырылды.
– 1942 жылы бізді Лепсіге жинады, – деп еске алады ардагер. – Пойызға қайтсең де кешікпеу керек, кешіксең трибунал күтіп тұр. Анам мені ертіп барды. Үлгеру үшін түні бойы түйемен жүріп отырдық. Пойыз қозғалған кезде анам артынан ілесе жылап жүгірді. Ол әскери қызметін Кавказдағы шекара әскерлерінде бастады. Оқу-жаттығу орталығында жас жауынгерді мерген мамандығына дайындады. Алда Сталинград маңындағы қанды шайқастар болды. Кавказдағы даярлық майдангер үшін ерік-жігері қайралып, жауынгерлік машығы шыңдалған нағыз өмір мектебіне айналды. Көпұлтты құрамның арасында Еревандағы шекара жасағында қызмет етіп, сонда орыс тілін үйренді. 1949 жылы елге оралды. Алдымен соттың хатшысы, содан кейін кіші лейтенант шенімен жедел уәкіл болды. Сталинабад милиция мектебін, кейін Киров атындағы ҚазМУ заң факультетін бітірген.
Он жыл бойы Тәңірберген Толғанбаев Алматы облысының Жамбыл АІІБ басқарды. 1976 жылдан бастап Іле ауданының прокуратурасында жұмыс істеп, онда ол азаматтардың құқықтарын заң жүзінде әрі әділ қорғаушы ретінде құрметке ие болды. Кейінгі жылдары Бұрындай қант зауытында заң кеңесшісі болып жұмыс істеді.
Ерлігі мен мінсіз қызметі үшін майдангер «Кавказды қорғағаны үшін», Жуков медальдарымен, басқа да мерейтойлық наградалармен және ерекше белгілермен марапатталды. Тәңірберген Толғанбаев – Іле ауданының Құрметті азаматы.
Майдангер көп жыл ұстаздық еткен жұбайы – Дәмелі Әлпейісовамен бірге алты бала тәрбиелеп өсірді. Олардан 12 немере, 16 шөбересі және бір шөпшек сүйіп отыр.
Қарулы күштердің Ұлттық әскери-патриоттық орталығында комиссия отырысы өтіп, онда әскери қызметшілердің балалары арасында «Отан отбасынан басталады» тақырыбында шығармашылық жұмыстарды қабылдау қорытындысы шығарылды.
Комиссия төрағасы – Қорғаныс министрлігі Тәрбие және идеологиялық жұмыс департаменті психологиялық-социологиялық және әскери-әлеуметтік жұмыс басқармасының бастығы подполковник Арман Қалышев атап өткендей, ұйымдастырушылар байқауды Отан қорғаушы күніне және Ұлы Отан соғысындағы Жеңістің 80 жылдығына орайластырды. Оған еліміздің барлық өңірінен 4 жастан 16 жасқа дейінгі 200-ден аса бала қатысты.
– Бұл байқауды 2017 жылы осы қызмет құрылған кезден бастап өткізіп келеміз. Алдымен гарнизондардың әскери бөлімдерінде жеңімпаздарды анықтап, 25 сәуірге дейін таңдалған жұмыстар бізге жіберілді. Бүгін біз оларды талдап, жеңімпаздарды анықтауға жиналдық, – деді Қарулы күштердің әскери қызметшілердің отбасы мүшелерімен жұмысты ұйымдастыру бөлімінің басшысы Тәттігүл Смағұлова.
Байқауға қатысушылардың жұмыстары жас және жанрлық санаттар бойынша қаралды. 4 жастан 6 жасқа дейінгі балалар мен 7 жастан 9 жасқа дейінгі бастауыш сынып оқушылары «Менің қаһарманым – әкем» тақырыбында суреттерін ұсынды. Орта сынып оқушылары (10–13 жас) өлең оқудан жарысты. Олар «Менің Отаным» тақырыбындағы өлеңдерін оқып, рилс түсірді. 14 жастан 16 жасқа дейінгі оқушылар «Ешкім де, ешқашан да ұмытылмайды» тақырыбында эссе жазып, Ұлы Отан соғысы жылдарындағы қазақстандықтардың ерлігі туралы бейнероликтер түсіріп, монтаждап, өз шеберліктерін көрсетті.
Жеңімпаздар мен жүлдегерлерді марапаттау Астанада балаларды қорғау күні өтеді. Үздік жұмыстар көрмеге қойылады. Іс-шараны ұйымдастырушылар қатысушыларға белсене атсалысқаны, ал ата-аналарына жас таланттарды қолдағаны үшін алғысын білдірді.
Екі соғыстың ардагері Владимир Иванович Дровосеков 99 жасында дүниеден озды.
Майдангермен қоштасу рәсіміне қалалық ардагерлер кеңесінің, Астана қаласы әкімдігінің жұмыспен қамту және әлеуметтік қорғау басқармасының өкілдері және әскери қызметшілер қатысты. Марқұмның денесін әскери оркестрдің сүйемелдеуімен құрмет қарауыл ротасының жауынгерлері шығарды.
Қалалық ардагерлер кеңесінің төрағасы Сансызбай Есілов өз сөзінде Владимир Дровосеков жас ұрпаққа үлгі болатын даңқты жауынгерлік жолдан өтті деді.
– Біздің ата-бабаларымыз өз өмірлерін құрбан етіп, жеңіске жетті. Аман қалғандары үйлеріне оралып, Владимир Иванович сияқты соғыстан кейін елді көркейтуге атсалысты. Олардың есімдері жадымызда жаңғырып, жүрегімізде мәңгі қалады, – деді С. Есілов.
Владимир Иванович 1926 жылы Солтүстік Қазақстан облысы Балкашино ауылында дүниеге келген. Ақмоладағы фабрика-зауыт училищесін бітірген соң, темір ұстаның ұлы № 317 әскери зауытта токарь болып жұмыс істеді.
Ол 1944 жылы соғысқа аттанып, 3-ші Беларусь майданында шайқасты. Қатардағы жауынгер Владимир Дровосеков сапер бөлімшесінде «Пальма» атты мина іздеуші овчарка итпен бірге қызмет етті. Бірде иті сапердің өмірін ажалдан арашалап қалды. Дегенмен соғыстың соңында итті қауіпті миссияға – танктерді жоюға дайындайды. Осылайша Владимир Иванович адал досынан айырылды.
Екінші дүниежүзілік соғыс қазақстандық сарбаз үшін 1945 жылдың қыркүйегінде бірақ аяқталды. Еуропадан ол Қиыр Шығысқа дейін барды, Сахалин мен Курил аралдарындағы теңіз катерлерінде қызмет етті. Үйіне 1952 жылы ғана оралып, Ақмоладағы арнайы комендатурада, содан кейін вагон жөндеу зауытында механик болып жұмыс істеді.
Жауынгердің қабіріне гүл шоқтары мен қалампырлар қойылды. ҚР Мемлекеттік әнұраны орындалғаннан кейін сарбаздың құрметіне салют атылды.
Қатардағы жауынгер Владимир Дровосеков әскери жолында II дәрежелі Отан соғысы орденімен, жаумен шайқаста көрсеткен батылдығы, табандылығы мен жанқиярлығы үшін жауынгер «Ерлігі үшін» медалімен марапатталды.
Парламент Сенатының халықаралық қатынастар, қорғаныс және қауіпсіздік жөніндегі комитетінің депутаттары Қорғаныс министрлігінің Бас әскери клиникалық госпиталінде болды.
Қорғаныс министрінің тыл және әскери инфрақұрылым жөніндегі орынбасары генерал-лейтенант Қаныш Әбубәкіров сенаторларды медициналық көмек көрсету шарттарымен, материалдық-техникалық базасымен және медициналық мекеменің кадрлық қамтамасыз етілуімен таныстырды.
Кездесу барысында парламенттегілер сәулелік диагностика бөлімшелеріне, зертханалық бөлімшеге, операциялық блокқа, травматология, неврология, медициналық оңалту бөлімшелеріне және әскери госпиталдің қабылдау бөлімшесіне барды.
Бас әскери клиникалық госпиталдің бастығы медициналық қызмет полковнигі Арман Ескендіров сенаторларға медициналық мекеменің ағымдағы қызметі, мүмкіндіктері мен көрсетілетін қызметтері жайлы толық айтып берді.
Депутаттар стационарлық және амбулаториялық емдеу, дәрілік заттармен қамтамасыз ету, диагностикалық қызметтердің жұмысы және пациенттердің тамақтануын ұйымдастыру мәселелеріне ерекше назар аударды.
Комитет төрағасы Андрей Лукин қазіргі қызметтегі әскерилерге де, ардагерлерге де медициналық қызмет көрсетудің деңгейі жоғары болуының маңыздылығын атап өтіп, медициналық инфрақұрылымды одан әрі дамыту және персоналдың біліктілігін арттыру қажет деді.
– Біз жабдықтардың жай-күйіне, әскери госпитальдің материалдық-техникалық қамтамасыз етілуіне және жалпы, жергілікті жерлердегі әскери медицинаға көңіліміз толады. Олардың басты міндеті – сарбаздардан бастап офицерлерге дейінгі барлық әскери қызметшілердің денсаулығын, қауіпсіздігін және өмірін сақтау, – деп атап өтті А. Лукин.
Бұдан басқа сенаторлар гарнизондарда қызмет ететін әскери дәрігер кадрларды даярлау, әскери медициналық мекемелерді жарақтандыру жөніндегі жұмысты жалғастыру, шақыру комиссияларының жұмысы мен қызметі туралы мәселелерді талқылады.
Парламенттегілер әскери-медициналық қамтамасыз ету жүйесін нығайтуға бағытталған бағдарламаларды заң жүзінде қолдау және дамытумен қатар, өзекті мәселелерді шешуге жәрдемдесуді жалғастыруға дайын екенін білдірді.
Сапарды қорытындылай келе, комитет төрағасы Андрей Лукин барлық әскери қызметшілер мен әскери дәрігерлерді Қазақстан халқының бірлігі күнімен, келе жатқан Отан қорғаушы күнімен және Ұлы Жеңістің 80 жылдығымен құттықтады.
Әскери-теңіз базасына делегация мүшелері зымыран-артиллериялық кемелермен және матростардың қызмет жаңдайымен танысты.
Тараптар жастарды әскери-патриоттық тәрбиелеу, әскери қызметті дәріптеу мәселелерін, сондай-ақ одан әрі өңіраралық өзара іс-қимылдың ықтимал бағыттарын талқылады.
– Әскери-теңіз күштерінің кезекшілікте тұрған кемелерін көргенде мақтаныш сезімі пайда болды. Тәуелсіздік – біздің басты құндылығымыз. Егер біз оны сақтап қалғымыз келсе, онда бейбітшілік пен қауіпсіздік үшін теңіз шебі күзетінде тұрған жауынгерлерге қолдау көрсетуіміз керек, – деп атап өтті Батыс Қазақстан облысы әкімінің көмекшісі Мақсат Мұқанов.
Атырау облысы әкімінің бірінші орынбасары Қайрат Нұртаев әскери теңізшілерді Ұлы Отан соғысындағы Жеңістің 80 жылдығы және Отан қорғаушы күнімен құттықтады.
Сапар достық іскерлік атмосферада өтті. Қонақтар Атырау және Батыс Қазақстан облыстарынан шақырылған әскери қызметшілерге алғыс хаттар мен естелік сыйлықтар табыс етті. Делегация мүшелері жылы қабылдағаны үшін ризашылық білдіріп, әскери теңізшілердің кәсібилігін жоғары бағалады.
Айта кетейік, іс-шара "Орал" зымыран-артиллериялық кемесі мен облыс әкімдігі арасындағы екіжақты ынтымақтастық туралы меморандумды іске асыру аясында өтті.
Қарағандыда Жеңіс күні мен Отан қорғаушысы күніне орай жыл сайынғы сарбаздар әні фестивалі өтті.
Іс-шараны Қарағанды облысының жастар саясаты мәселелері жөніндегі басқармасы ұйымдастырды. Оған Қорғаныс министрлігі мен Ұлттық ұланның әскери бөлімдерінен он талантты мерзімді әскери қызметші қатысты.
Фестивальде Қорғаныс министрлігінің сарбаздары ерекше көзге түсіп, Бас жүлде, бірінші және үшінші орын еншіледі.
Фестивальдің Гран-приін 31775 әскери бөлімінен ефрейтор Арман Данагұл жеңіп алды. Ол «Поклонимся великим тем годам» әнін орындап, көрермендерге сол сұрапыл жылдарды көз алдына елестетті. Бұл туынды көрермендердің көзіне жас үйіртіп, қазылар алқасының жүрегіне жетті.
– Мен үшін бұл ән соғысып, бейбітшілік орнатқан ата-бабаларымыздың үні іспеттес. Мен бабалар алдында, көрермендер алдында және ел алдында сондай жауапкершілікті сезіндім. Өзімді және Отанымды тек сапта тұрып қана емес, сахнада да көрсетіп жүргенімді мақтан етемін, – деді А. Данағұл марапаттаудан кейін.
Қазылар алқасы бірінші орынға «Батырлар ұраны» патриоттық әнін орындаған 85510 әскери бөлімінің сарбазы Диас Өтесті лайық деп таныды. Оның күркіреген үнінде Отанды қорғауға дайын заманауи қорғаушының күш-қуаты бұрынғы батырларымыздан берілгендей сезілді.
Аңызға айналған «Жеңіс күні» әні өткен буынның ерлігін, соғыс құрбандарына тағзым ету мен бейбітшіліктің қуанышын қайта еске салды. Бұл әнді үшінші орын алған 31775 әскери бөлімінің кіші сержанты Мейірлан Хамза орындады.
Фестиваль шығармашылық арқылы патриоттық құндылықтарды сақтап, бүгінге жеткізудің қаншалықты маңызды екенін айқындады. Сарбаздар болса, тек жауынгер ғана емес, ұлттың мәдениеті, тарихы мен рухын дәріптеушілер екенін көрсетті.
«Оңтүстік» өңірлік қолбасшылығы байланыс полкінің әскери қызметшілері жабық зираттағы бауырластар қабірлеріне абаттандыру жұмыстарын жүргізді.
Бұл зираттарда Ұлы Отан соғысы жылдарында Жамбыл қаласының (қазіргі Тараз) госпитальдерінде алған жарақаттарынан қаза тапқан жауынгерлер жатыр.
Сұрапыл соғыс жылдарында жараланған жауынгерлер майдан шебінен тылға жеткізілді. Олардың көпшілігі Жамбыл қаласындағы ауруханаларда емделді. Дәрігерлердің күш-жігеріне қарамастан, ауыр жарақаттарын жеңе алмағандар бар. Бұл зиратта Отан қорғау жолында өз өмірін қиған батырлар жатыр.
Әскери қызметшілер аумақты тазалап, естелік белгілерін жаңартып, сырлап, қабірлерді ретке келтірді. Осылайша олар қаза тапқан жауынгерлердің ерлігіне тағзым етіп, құрмет көрсетті.
Мұндай акциялар тарихты ұмытпаудың маңыздылығын көрсетіп, елді жаудан қорғап, өздерін құрбан еткендерді жадымыздан өшірмей еске салады.
Астана қаласындағы республикалық физика-математика мектебінің оқушылары Ұлы Отан соғысындағы Жеңістің 80 жылдығына арналған әскери шеруге дайындалып жатқан әскери қызметшілердің далалық лагерінде болды.
Оқушылар әскери қызметшілердің далалық жағдайдағы тұрмысын көрді. Олар байланысшылар шатырында, медициналық пунктте болды. Балаларға әскери техника мен қару-жарақ, Қарулы күштер түрлерінің және әскер тектерінің киім үлгілері көрсетілді.
Бейресми жағдайда әскери қызметшілер бүлдіршіндерге өздерінің қызметі мен парадқа дайындығы жайлы әңгімелеп берді. Оқу алаңында олар шараның іс жүзіндегі бөлігін де көрді.
– Маған экскурсия өте ұнады. Біз заманауи әскери техниканы және соғыс жылдарындағы техниканы, яғни Т-34 танктерін, «Катюшаларды» және зеңбіректерді көрдік. Әсіресе, әскери қызметшілердің қалай жаттығатынын көру қызықты болды. Олар сапта өте сымбатты және нық қадамдар жасайды екен, – деді 4 сынып оқушысы Нұрлыбек Әділханов.
Мұндай саяхат балалардың қызығушылығын арттырып, елдің тірегі мен мақтанышы боп жүрген Отан қорғаушыларға құрметпен қарау сезімін оятты.