«Алатау-құс» асыл тұқымдық базаны дамытуға 6,5 млрд теңге инвестиция салады

Қазақстанда құс шаруашылығы саласының өндірістік және технологиялық дербестігін нығайту бағытындағы жұмыстар жалғасып жатыр. Бұл ретте отандық асыл тұқымдық базаны дамыту және инкубациялық жұмыртқа өндіретін өндіріс орындарын қалыптастыру негізгі бағыттардың бірі.

Осы бағытта «Алатау-құс» акционерлік қоғамы құны 6,5 млрд теңгені құрайтын асыл тұқымды репродуктор салу жөніндегі инвестициялық жобаны жүзеге асыруда. Кешен Алматы облысының Арна ауылында салынып жатыр.

Жоба толық аяқталғаннан кейін кәсіпорын жылына 12 млн данаға дейін инкубациялық жұмыртқа өндіре алады. Жеке асыл тұқымдық базаның құрылуы «Алатау-құсқа» инкубациялық жұмыртқаға деген ішкі қажеттілікті қамтамасыз етуге, өндірістік үдерістерді басқару тиімділігін арттыруға және сыртқы жеткізілімдерге тәуелділікті кезең-кезеңімен азайтуға жол ашады.

Өз өндірісіңнің болуы өндіріс көлемін неғұрлым дәл жоспарлауға, асыл тұқымдық материалдың сапасын бақылауды күшейтуге және құс өсіруден бастап дайын өнім шығаруға дейінгі бүкіл өндірістік тізбектің тұрақтылығын арттыруға мүмкіндік береді.

Жобаны іске асыру кезінде ветеринариялық және биологиялық қауіпсіздік мәселелеріне ерекше мән берілуде. Асыл тұқымды репродуктор қолданыстағы ветеринариялық-санитариялық талаптарды ескере отырып жобалануда. Нысан құстарды ұстау жағдайларын, өнім сапасын және биологиялық қауіпсіздік талаптарының сақталуын бақылауға арналған заманауи жүйелермен жабдықталады.

Жобаның іске асырылуы агроөнеркәсіптік кешенді одан әрі дамыту және Қазақстанның азық-түлік қауіпсіздігін нығайту міндеттеріне сәйкес келеді. Құс шаруашылығы үшін тұрақты ішкі өндірістік базаны қалыптастыру стратегиялық маңызға ие. Бұл бағыт отандық асыл тұқымды қорды, жемшөп базасын дамыту, заманауи технологияларды енгізу және өндіріс әлеуетін нығайтуды қамтиды.