Қарағанды облысында көкөніс қоймаларының сыйымдылығы 10 мың тоннаға артады
Ауыл шаруашылығы министрлігі ауыл шаруашылығы өнімдерін сақтау инфрақұрылымын дамыту, суармалы жерлердің көлемін ұлғайту және агроөнеркәсіптік кешендегі инвестициялық белсенділікті қолдау бағытында жүйелі шаралар қабылдап келеді. Бұл азық-түлік қауіпсіздігін нығайту, отандық өндірістің тұрақты өсуін қамтамасыз ету және ішкі нарықты тұрақты өніммен қамту үшін маңызды.
Қарағанды облысында ауыл шаруашылығы өнімдерін сақтау қуаттары кезең-кезеңімен кеңейтіліп келеді. 2026–2027 жылдары өңірде жалпы сыйымдылығы 10 мың тонна болатын екі жаңа нысанды пайдалануға беру жоспарлануда. Жобаларды іске асыру өсірілген өнімнің сақталуын қамтамасыз етуге, маусымдық шығындарды азайтуға және көкөніс өнімдерін жыл бойы ішкі нарыққа біркелкі жеткізуге мүмкіндік береді.
Қазіргі таңда облыста сақтау инфрақұрылымының едәуір базасы қалыптасқан. Өңірде жалпы сыйымдылығы 329 мың тонна болатын картоп сақтауға арналған 121 қойма, сондай-ақ жалпы сыйымдылығы 24 480 тонна болатын 20 астық қоймасы жұмыс істейді.
Аграршылар өз инфрақұрылымын дамытуға инвестиция салуды жалғастыруда.
Атап айтқанда, «Достық-2009» серіктестігі сыйымдылығы 6 мың тонна болатын заманауи көкөніс қоймасының құрылысын аяқтап келеді. Нысанды биыл пайдалануға беру жоспарланған.
Тағы бір жоба «Юбилейное» шаруашылығында жүзеге асырылуда. Мұнда бір мезгілде 4 мың тонна картоп сақтауға арналған қойма салынуда. Құрылысты аяқтап, нысанды келер жылы іске қосу межеленген.
Осылайша, екі жаңа нысан пайдалануға берілгеннен кейін сақтау қуаттарының жалпы көлемі 10 мың тоннаға ұлғаяды. Бұл аграршыларға өнім қорын тиімді басқаруға, өнімнің шығынын азайтуға және оны маусымаралық кезеңде өткізуге жол ашады.
Сонымен қатар өңір шаруашылықтары өндірістік қуаттарын арттырып, заманауи агротехнологияларды енгізуде.
Мәселен, Қарағанды ауылдық округіндегі «Шығыс» шаруашылығы бұған дейін қуаттылығы 1,5 мың тонна болатын астық қоймасын салған. Мұнда картоп, бидай және арпа өсіріледі.
Қазіргі уақытта шаруашылық жаңа суару жүйесін орнатуды жоспарлап отыр. Бұл су ресурстарын тиімді пайдаланып, суармалы жерлердің көлемін ұлғайтып, ауыл шаруашылығы дақылдарының өнімділігін арттырады.
«Суармалы жерлердің көлемін ұлғайтып, өндірістің тиімділігін арттыру үшін субсидиялау бағдарламасына алдағы уақытта да қатысуды жоспарлап отырмыз.
Мемлекеттік қолдау осындай жобаларды іске асыруға, шаруашылықты жаңғыртуға, заманауи технологияларды енгізуге және өндірілетін өнім көлемін арттыруға мүмкіндік береді. Бұл әсіресе өңірдің азық-түлік қауіпсіздігін нығайту үшін маңызды», – деді «Шығыс» шаруашылығының басшысы Шамиль Осин.
Бұдан бөлек шаруашылық мал бағытын да дамытып келеді.
Оның аумағында 1 мың басқа арналған ірі қара мал фермасының құрылысы жалғасуда. Жобаға салынатын инвестицияның жалпы көлемі 1,5 млрд теңге.
Ауыл шаруашылығы министрлігінде өнімдерді сақтау инфрақұрылымын дамыту агроөнеркәсіптік кешенді нығайтудың маңызды бағыттарының бірі.
Жаңа көкөніс және картоп қоймаларын салу өсірілген өнімді сақтап қана қоймай, оны жыл бойы нарыққа біркелкі жеткізуді қамтамасыз етеді. Бұл маусымдық тапшылықты азайтуға, баға ауытқуларын тұрақтандыруға және отандық ауыл шаруашылығы өнімдерінің халық үшін қолжетімділігін арттыруға барынша ықпал етеді.