Қазақстан мен ФАО азық-түлік қауіпсіздігі саласындағы жаңа бастамаларды талқылады
Ауыл шаруашылығы министрі Айдарбек Сапаров Тәжікстанда өткен ФАО-ның Еуропа және Орталық Азия бойынша өңірлік конференциясының 35-сессиясы аясында Біріккен Ұлттар Ұйымының Азық-түлік және ауыл шаруашылығы ұйымының Бас директоры Цюй Дунъюймен кездесті.
Келіссөздер барысында тараптар Қазақстан мен ФАО арасындағы ынтымақтастықтың қазіргі жай-күйі мен келешегін талқылады.
«Еліміз ФАО-ны өңірлік азық-түлік қауіпсіздігін қамтамасыз етудегі негізгі стратегиялық серіктес ретінде қарастырады. Біздің сарапшы топтарымыз арасында қалыптасқан сенім мен өзара іс-қимыл деңгейін жоғары бағалаймыз. Дәл осы үйлесімді жұмыс бірқатар маңызды құжаттар мен бастамаларды әзірлеудің соңғы кезеңіне шығуға мүмкіндік берді», — деп атап өтті министр. Сонымен қатар Астанадағы ФАО-ның Байланыс және әріптестік бюросының тиімді қызметіне жоғары баға берді.
Қазіргі уақытта ұйыммен бірлесіп жалпы құны 9,5 миллион АҚШ долларын құрайтын 10 негізгі жоба жүзеге асырылуда.
Олардың қатарында сүтті мал шаруашылығын дамытудың ұзақ мерзімді бағдарламасын әзірлеу, күйіс қайыратын ұсақ жануарлар обасының алдын алу және анықтау әлеуетін күшейту, сондай-ақ Армения, Түркия және Өзбекстанмен бірлескен бруцеллезге қарсы күрес жобалары бар.
Сонымен қатар селекция және тұқым шаруашылығын дамыту, шегірткеге қарсы күрес пен мониторингті күшейту, Орталық Азия елдері мен Ауғанстанда зиянкестерге қарсы ауқымды өңірлік жобаны іске асыру бағытында жұмыстар қолға алынуда.
ФАО – Қазақстан серіктестік бағдарламасы аясында Ақмола, Алматы, Қостанай және Солтүстік Қазақстан облыстарында деректер жинау жұмыстары аяқталды. Сондай-ақ «Қазақстандық сорттар мен тұқымдар» ұлттық бастамасының негізгі индикаторларын айқындау бойынша бірқатар бірлескен кеңестер өткізілді.
Бұдан бөлек, 2026–2029 жылдарға жоспарланған топырақтағы органикалық көміртекті мониторингтеу, бағалау және растаудың ұлттық жүйесін әзірлеу жобасы іске қосылу кезеңінде тұр.
«Өткен жылы Қазақстанға барып, ел басшылығымен кездесу барысында өзара іс-қимылдың өзекті мәселелерін талқыладым. Бүгінде қол жеткізілген келісімдерді іске асыруда нақты ілгерілеуді көріп отырмыз.
Аграрлық азық-түлік жүйелерін тұрақты дамыту бойынша өңірлік көшбасшылығы мен белсенді ынтымақтастығы үшін Қазақстанға алғыс айтқым келеді. Сондай-ақ Қазақстан Президентіне ФАО қызметі мен азық-түлік қауіпсіздігін нығайтуға бағытталған бастамаларды қолдағаны үшін ризашылығымызды білдіреміз.
Осы ретте ФАО штаб-пәтерінде қазақ бөлмесінің ашылуын да ерекше атап өткім келеді. Бұл — Қазақстан мен ұйым арасындағы әріптестік пен достықтың нығаюының маңызды көрінісі», — деді Цюй Дунъюй. Одан әрі негізгі бағыттар бойынша серіктестікті тереңдетуге дайын екенін жеткізді.