Ауыл әкімдерінің диалог-платформасында аймақтық саясаттың басымдықтары және ауылдық аумақтарды дамыту мәселелері талқыланды

Астанада «AMANAT» партиясының ұйымдастыруымен ауылдық әкімдердің диалог-платформасы өтті. Ашық форматта өткен панельдік сессияларда ауылдық аумақтарды дамытудың негізгі бағыттары, мемлекеттік басқару сапасын арттыру және орталық пен өңірлер арасындағы өзара іс-қимылды күшейту мәселелері талқыланды.

Іс-шараға Үкімет мүшелері, Премьер-Министрдің орынбасарлары, ведомство басшылары, Мәжіліс депутаттары және ауылдық округ әкімдері қатысты.

Диалог алты негізгі бағыт бойынша жүргізілді: әлеуметтік саясат, аграрлық даму, өңірлік инфрақұрылым, бюджеттік тұрақтылық, цифрландыру және сервистік мемлекеттік қызмет.

Ерекше назар «Аймақтық саясат: халық табысын арттыру және ауыл әкімдерінің рөлі» атты сессияға аударылды.

Ауыл шаруашылығы вице-министрі Ермек Кенжеханұлы ведомство жұмысының басымдықтарын атап өтті. Оның ішінде жер ресурстарын тиімді пайдалану, жайылымдарды кеңейту, фермерлерді қолдау және ауыл шаруашылығы өнімдерін қайта өңдеу саласын дамыту негізгі бағыттар ретінде көрсетілді.

Вице-министр жер қорын ұтымды басқарудың, АӨК инфрақұрылымын жаңғыртудың және ауылдық жерлерде табысты арттыруға бағытталған жобаларға, соның ішінде «Ауыл аманаты» бағдарламасына тұрғындарды кеңінен тартудың маңыздылығын айтты.

Сонымен қатар, жобаларды келісу рәсімдерін жеңілдету, инженерлік инфрақұрылымды кеңейту және жеңілдетілген қаржыландыру мүмкіндіктерін дамыту жұмыстарының жалғасып жатқанына тоқталды.

Басқа тақырыптық сессияларда табиғи ресурстарды басқару, әлеуметтік қолдау шаралары, цифрландыру, мемлекеттік қызметтердің сапасы және төртінші деңгейлі бюджеттердің қаржылық тұрақтылығы мәселелері талқыланды.

Диалог-платформа ауыл әкімдері мен орталық мемлекеттік органдар арасындағы тікелей қатынастың тиімді құралына айналып, жергілікті басқаруды нығайтуға және ауылдық аумақтардың кешенді дамуын жеделдетуге ықпал ететін болады.