Ауыл әкімдерінің диалог-платформасында АӨК пен ауылдық аумақтарды дамыту басымдықтары талқыланды

Астанада өткен ауыл әкімдерінің диалог-платформасы аясында ауылдық аумақтарды дамыту, жер әкімшілігі және жергілікті өзін-өзі басқарудың тиімділігін арттыру бойынша маңызды мәселелер талқыланды.

Іс-шара ауылды кешенді дамыту, ауыл әкімдері институтын нығайту және жергілікті өзін-өзі басқарудың тиімді тетіктерін енгізудің өзекті сұрақтарын ортаға салған негізгі алаңға айналды.

Ауыл шаруашылығы вице-министрі Аманғали Бердалин «Табиғи ресурстарды ұтымды пайдалану аясында ауыл шаруашылығын дамыту» атты панельдік сессияға қатысып, 2025 жылдың 10 айындағы агроөнеркәсіптік кешеннің даму қорытындылары туралы баяндады.

Сондай айтылғандай, АӨК-тің жалпы өнім көлемі 5,4% өсіп, 8,1 трлн теңгені құраған, оның ішінде өсімдік шаруашылығы – +6,7%, мал шаруашылығы – +3,4%. Тамақ өнімдері өндірісі 9,1%-ға, сусындар өндірісі 8,7%-ға ұлғайды. Негізгі капиталға салынған инвестициялар 137%-ға көбейіп, 1,2 трлн теңгеге жетті, ал АӨК экспорты 35,9%-ға өсіп, 4,7 млрд доллар болды.

Бидай монокультурасының алаңы 900 мың гектарға қысқарып, бұршақты, майлы дақылдар мен картоп егісі ұлғайды. 27,1 млн тонна астық бастырылып, бұршақты және майлы дақылдардан рекордтық көрсеткішке қол жеткізілді. Мақта өндірісі 428 мың тоннаға жетіп, соңғы 18 жылдағы ең жоғары деңгейді көрсетті.

5% мөлшерлемемен жеңілдетілген кредиттеу кеңейтілді, ерте қаржыландырудың жалпы көлемі 1 трлн теңгені құрады. Отандық техникаға арналған жеңілдетілген лизинг бағдарламасына 250 млрд теңге бөлініп, 6 мың техника сатып алынды. Өңдеуді қолдауға 44 млрд теңге бағытталды. Бордақылау алаңдарын жеңілдетілген кредиттеу іске қосылды (50 млрд теңге).

Панельдік сессия қатысушылары жерді бөлу, қоғамдық жайылымдармен қамтамасыз ету, инженерлік желілерге қосу келісімдерін жеңілдету, ауыл әкімдіктеріне тән емес функцияларды алып тастау мәселелерін де назардан тыс қалдырмады. «Ауыл аманаты» бағдарламасының шарттарын жақсарту және ауылдық өңдеуді дамытуға да көңіл бөлінді.

Жалпы айтқанда, диалог-платформа орталық пен өңірлер арасындағы өзара іс-қимылды нығайтудың маңызды құралы іспетті болды.
Министрлік өз кезегінде сала тиімділігін арттыру және ауылдық аумақтарды дамыту бағытындағы жұмысын одан әрі жалғастырады.