Павлодарда IV халықаралық «Pro Молоко» форумы мен «QazaqSut» көрмесі аяқталды

Аймақтағы сүт саласының басты оқиғалары — IV халықаралық «Pro Молоко‘25» сүт бизнес форумы мен арнайы «QazaqSut» көрмесі 26-27 маусым күндері Павлодарда өтті. Бұл іс-шаралар 70-тен астам компания мен 10-нан астам елдің өкілдерін жинап, Қазақстан мен Орталық Азиядағы сүт секторын тұрақты дамыту жолдарын талқылауға және тәжірибе алмасуға тиімді алаң болды.

Форумды ұйымдастырушылар — «QazaqSut» республикалық палатасы, «Қазақстанның Сүт Одағы» ЗТБ және Agro Industry KZ компаниясы.

Павлодар облысының қабылдаушы тарап ретінде таңдалуы — оның сүт саласының дамуына қосқан айрықша үлесімен байланысты. Бұл өңір сүт өндіру бойынша көшбасшылар қатарында және инфрақұрылымды белсенді түрде дамытып жатыр. 2025 жылдың соңына дейін мұнда 6 жаңа сүт кешені іске қосылады, оның ішінде Қазақстандағы екінші роботтандырылған ферма бар.

Форумға АҚШ, Франция, Италия, Қытай, Ресей, Беларусь, Түркия, Германия, Нидерланды және басқа да елдерден жетекші сарапшылар, инвесторлар, фермерлер, қайта өңдеушілер мен жабдық жеткізушілері қатысты.

Форумның іскерлік бағдарламасы аясында сүт өндірісінің тиімділігін арттыру, қайта өңдеуді жаңғырту, экспорттық әлеуетті кеңейту және тұрақты агротехнологияларды енгізу мәселелері қаралды.

«Жаңа инвестициялық жобаларды іске асыру сүттің өзіндік құнын төмендетуге және сыртқы нарықтарға шығуға мүмкіндік береді», — деді ҚР Ауыл шаруашылығы вице-министрі Азат Сұлтанов.

Форум аясында алғаш рет суармалы егіншілікке арналған бөлек бөлім ұйымдастырылып, Павлодар облысындағы кәсіпорындарда ылғал үнемдеу технологияларын қолданудың практикалық үлгілері көрсетілді.

Көрмеде сүт фермаларына, қайта өңдеуге, логистика мен қаптауға, сондай-ақ ветеринария мен генетика салаларына арналған ең жаңа шешімдер ұсынылды. Ерекше назар сүтінде кәдімгі казеинге төзімсіз адамдарға жарамды «A2A2» генотипті сиырларға аударылды.

Форум аясында қатысушылар сүт фермалары мен заманауи сүт өңдеу кәсіпорнына барған агротехнологиялық турға да қатысты.