Дархан Станбеков – ауыл шаруашылығын таңдаған қазіргі заманғы жас буынның жарқын өкілі. Ол үшін жерге еңбек ету тек кәсіп емес, шынайы мамандыққа айналды

Дархан Станбековтың ауыл шаруашылығына бет бұру жолы адамға деген қамқорлықтан басталды: ол С. Асфендияров атындағы Қазақ ұлттық медицина университетін тәмамдап, терапия бойынша интернатураны, қоғамдық денсаулық сақтау саласында магистратураны меңгерген.

Жедел жәрдем қызметінде, кейіннен Қазақ Ұлттық фтизиопульмонология институтында фтизиатр болып жұмыс істеді. Алайда жүрек қалауы тыныш далаға, мал шаруашылығына, туған жерге пайдалы еңбекке жетеледі.

Бүгінде оның «Жанасыл» шаруашылығы мал шаруашылығымен, егіншілікпен айналысады, ал 2023 жылдан бастап асыл тұқымды қой өсіруді жолға қойған. Жаз мезгілін ол түгелдей дерлік далада өткізеді, жем-шөпті өзі дайындайды, төлдеу маусымында демалыссыз жұмыс істейді.

Дархан - республикалық және халықаралық асыл тұқымды қой көрмелеріне тұрақты қатысып, жүлделі орындарға ие болып жүр. Сондай-ақ ол туған ауылында қайырымдылық пен қоғамдық бастамаларға белсене қатысып, мұқтаж жандарға көмектесіп, жастарды қолдап келеді.

Дархан Станбековтың өмір жолы – жоғары білімді, ісіне адалдықты және туған жерге деген сүйіспеншілікті ұштастыруға болатынын дәлелдейтін шабытты мысал. Мұндай азаматтар – ауыл экономикасының тірегі, елдің мақтанышы.