Қонаевта жылына 1 млн тонна өсімдік майы, бидай және құрама жем ұны экспортталатын әлеуеті бар жоба іске асырылуда

Алматы облысында «Қапшағай бидай өнімдері» ЖШС-нің өндірістік алаңын жаңғырту жұмыстары басталып, үш жаңа зауыттың құрылысы қатар жүргізілуде. Жоба бірнеше бағытты қамтиды: өсімдік майын, бидай және құрама жем ұнын өндіру.

Жобаның құны — 8 млрд теңге. Кәсіпорын ішкі нарықтағы маңызды ойыншылардың біріне айналып, өнімін шетелге, ең алдымен Қытайға экспорттауды жоспарлап отыр.

Қазіргі уақытта қоймалар, терминалдар мен өндірістік корпустардың құрылысы, теміржол жолдарын жаңғырту жұмыстары жүргізілуде. Кешенді іске қосу биылғы жылға жоспарланған. Жылдық экспорт көлемі 1 млн тонна өнімге жетеді деп күтілуде.

Жобаның ерекшелігі — орау жұмыстарының толықтай автономды болуы: аумақта қаптар шығаратын желілер орнатылған.

Бұл жоба Қонаев қаласының инвестициялық пулына енгізілген, бүгінде оның құрамында жалпы инвестиция көлемі 2,4 трлн теңгені құрайтын 39 жоба бар. Осы жобаларды жүзеге асыру нәтижесінде 17 000-нан астам тұрақты жұмыс орны құрылмақ. Қазіргі таңда Қонаев қаласында 12 өнеркәсіптік кәсіпорын жұмыс істейді, ал қолға алынған бастамалар өңірдің өндірістік әлеуетін едәуір арттырмақ.